EPURE "貼地"一星法國菜

<RATING>

Fine Dining: 91.4 / 100 (Ranking: A)

食物: A, 環境: A, 服務: A, 抵食: A+

推介菜式: 自家製煙三文魚, 鴨肝, The must-have “vol au vent”

回水之作: 冇~

<RESTAURANT INFO>

Cuisine: French

Ranking: 米芝蓮一星

City: Hong Kong

Tel: +852 3185 8338

Address: Shop 403, Level 4, Ocean Center, Harbour City, Tsim Sha Tsui, Kowloon

Website: http://www.epure.hk/

<DINING INFO>

Date: 10th December, 2016

Time: 1:30pm – 3:45 pm

Meal: Lunch

Pax: 2

With: H. Ho

Price: $1,800

- Food: $1,072

- Beverage: $485

- Others: 10% service charge + tips

<餐廳來頭>

餐廳隸屬於Dalloyau集團, 而Dalloyau 本身係法國有好耐歷史既Pastry店鋪, 專賣面包同甜品, 但今次撈過界,賣埋法國菜 Fine Dining.

<叫野食>

一食完餐飯番到屋企在下已經執筆寫Review, 可惜寫到一半既時候就遇上份工既peak season, 所以呢篇野一路耽誤到四個月後既今日先完成到… 唉…

Any肥, 講番呢間野, 由於係第一次黎呢間餐廳, 食夜晚既話每位最少千千聲, 如果唔好食就瀨晒野, 所以, 如果想一窺餐廳既實力又唔想冒咁大風險可以黎食lunch/ brunch.

當時禮拜六日既Brunch set四個course盛惠每位$438, 而且大部份菜式都唔駛加錢, 米芝蓮一星, 咁既價錢, 三個字形容: 抵到爛!!!

今日手多又check下佢地既website, Brunch Set已漲價至$498, 而且超好食既鴨肝仲要另外加錢… 真係人怕出名豬怕肥… 價錢跟隨名氣直線上升. 不過老實講, 以香港今日既時勢, 法國菜4道菜, 500蚊有找, 真係唔算貴, 只不過同 “抵” 呢個字既距離遠左啲啲.

<叫野飲>

Weekend Brunch 有一個幾吸引既配搭, 就係Champagne free flow~ 每人大概加二百幾就可以任飲指定香檳, 本身在下一開始都打算咁叫, 不過諗起呢兩日已經劈得太多, 加上貴精不貴多, 任飲飲到死倒不如散叫一枝靚仔少少既仲好. 上openrice知道餐廳有自家品牌既香檳, 心諗擺得自己個名上枱都差極有譜吧, 所以打算叫兩杯試試, 然後飲完轉白酒襯番啲海鮮主菜.

到落單時侍酒師善意推介我地不如叫半枝, 因為香檳每杯$188, 兩杯加埋$376, 而半枝賣緊$400, 爭果幾廿蚊但多一杯份量, 既然講到咁, 在下當然more than willing 接受offer 啦~

<FOOD>

Menu: Brunch Menu

Price: $438 per person

Amuse Bouche - Cheese puff, potato tart (with truffle)

芝士泡芙, 松露薯仔撻

好味程度: 4.5/5

一坐低就送上Amuse Bouche, 賣相幾精緻, 迷你既芝士泡芙, 鬆軟非常, 咬落就爆發出迷人既parmesan cheese香味. 至於bite size 既potato tart, 不出所料, 薯仔同松露係好朋友, 縱使粒野唔大, 但薯味同松露味就十分濃烈, 重點係佢地夾到, 有驚喜!

其他餐廳一般都會用一啲偏清新, 帶酸性既食物去做一個starting, 用黎引下胃口, 而呢度夠膽死反傳統, 一黎就黎啲咁heavy既小食, well, it works!!! 成個人當堂醒左.

就係呢兩粒amuse bouche, 令在下對呢餐飯有更高既期望~

Bread Basket 面包籃

好味程度: 4.5/5

一共三款面包, 一件酥皮, 一件軟身, 一件法包. 酥皮係呢度既強項 (餐廳所屬既集團係以pastry起家), 果然冇錯, 好香好輕身, 唔駛問啊貴, 一定係用左頂級既牛油去整既呢個面包, 而且仲要落左好多添… 額外再配埋帶丁點辣既chili butter, 唉, 腹肌無救了…

軟身包本身亦帶好香既牛油味, 又係一件上品. 至於法包baguette, 外號 “掟死狗”, 真係包如其名, 又硬又韌, 在下食左一半就投降, 當留肚吧~

<題外話>

一個出色既Explanation係用人地明白既語言去解釋人地唔明既野. 正如你同鬼佬解釋一個中文詞語時, 你斷估都唔會用中文解釋吧.

同樣地, 侍者介紹面包時,一輪嘴用英文專有名詞去介紹, 好老實講: 除左最後一款Baguette 在下係聽得明之外, 其他兩款在下都唔知佢講咩~ 對於果件酥皮面包, 在下除左知道佢有一個在下唔識讀既名之外, 就一無所知了.

需知道唔係個個入黎餐廳既客人都係蔡欄, 更加唔係一本飲食字典(仲要英語版添…), 你估在下真係知道食緊啲咩??

就係呢啲喺服務上既少少瑕疵, 令客人更難投入菜式之中 (因為食緊咩連自己都唔知), 從而令成個experience 唔夠完美, 可惜是也~

OK, 發表完偉論, 繼續~

Appetizer

Chilled Maine Lobster, heirloom beetroot, lime leaf and ginger (推介!)

緬因龍蝦 (凍食), 甜菜頭, 青檸葉及薑

好味程度: 9.5/10

Price: $48 supplement

在下既第一個前菜, 上網見個個都盛讚呢道龍蝦, 在下當然係人試我試, 永無執輸! 龍蝦新鮮, 縱使龍蝦本身鮮味唔突出, 但咬多兩下都仲食得到鮮甜味道. 至於Texture係拎滿分的, 果種爽口帶有少少質感既感覺, 的確Fascinating! 者係令人著迷咁解~ (男神子華教落: 真心說話用外語講, 真心好多~)

另一主角 – 甜菜頭, 菜如其名, 真係好甜, 不過佢隻甜並唔係人工後加上去既甜, 而係佢本身既甜味. 廚師好跟得上潮流, 又係用幾種方法(Puree, 啫喱, 薄脆) 煮同一種食材, 再加上玩heirloom (有唔同品種甜菜頭), 幾款煮法multiply幾款品種, 七七四十九變, 創造無限配搭. 呢一大堆頭既菜頭俾到既驚喜程度完全唔輸俾隻龍蝦! 雙主角是也!

House smoked Isigny salmon, faisselle cheese, vodka jelly with lemon (supplement Kaviari oscetra caviar 5 grams) (推介!)

自家製煙三文魚, 芝士醬汁, 伏特加啫喱配檸檬 (另加5 gram 魚子醬)

Price: $148 supplement (for caviar)

由於友人唔想所有菜式都同在下一樣, 希望大家可以share黎試下, 所以叫左侍者推介既三文魚.

賣相對於一般人黎講可能唔係話太驚喜, 但對在下呢個有強逼症既人黎講, 見到6條長度一樣, parallel to each other 既食物, 感覺好治癒啊!!!

見到咁靚既賣相, 在下貪婪心急速冒起, Share (強搶)左友人差唔多一半條魚~ 呵呵~ 侍者推介既食法係喺三文魚度加少少芝士汁, 蛋糕, 同埋特登加左成舊水既魚子醬夾埋一齊食. 在下當然係跟足order, 照做無誤.

三文魚經過煙燻後依然保持嫰滑, 但同時create 到比刺身三文魚firmer既質感, 食落唔似魚生成條軟皮蛇撻喺條脷度, 又唔會熟晒鞋恰恰. 魚香十足不在話下, 加埋俾侍者upsell既魚子醬, 魚子本身既咸味同埋鮮味(腥味?) 將條魚帶到另一個層次, 簡單黎講就係delicious!!!

由於佢太好味, 其光芒已蓋過晒其他配菜, 所以在下對佢地不予置評.

Torched duck foie gras, roasted parsley root mousseline, pickled crosnes & hazelnut (推介!)

鴨肝, 烤香芹根蓉, 醃甘露子及榛子

好味程度: 10/10

在下曾經講過, 去一間有名氣既法國餐廳食飯如果有鵝肝/ 鴨肝, 一定要叫上一客, 因為九成九有驚喜! 呢度亦唔例外, 先講份量, 本以為4道菜先收4舊水既套餐, 碟餸會細細碟, 但一望舊鴨肝就知道錯了… 在下粗略估計有半隻手掌咁大. 鴨肝肥美, 煎到外脆內嫰就一早預左, 香, 油, 滑一應俱存, 呢部份滿分!

今次想將個spot light 轉向啲配菜. 右面果pat係香芹根蓉, 至於exactly係咩黎, 在下都唔係好知, 但佢好似又帶少少磨菇味道, 即管當佢係磨菇蓉吧, 同鴨肝做一個對比, 一滑一鞋; 鴨肝上面又有啲碎碎 (香料同榛子碎既mix), 亦都contrast番個鴨肝, 一個soft, 一個crunchy! 隔離有幾條醃甘露子 (呢個名係在食完番屋企上網查的), 質地爽口,似日本漬物, 又可以同鴨肝做平衡喎, 一爽一creamy; 而醃製既蔥頭同甜菜頭片, 用佢地酸味, balance 番鴨肝既油膩.

在下諗左好耐, 希望用呢個麻麻地既比喻去解釋呢道菜式如何高質: 真正既娘娘唔會只係收一隻兵, 而係被成隊士兵擁護著, 而且每隻兵都有唔同既技能, 各司其職, 照顧娘娘唔同需要, 例如有伙頭兵, 有運輸兵, 有科技兵等等等. 而家既情況係一樣, 每一款配都同鴨肝產生唔同火花, 重點係咩? 就係令到每啖鴨肝都有唔同驚喜, 相同得黎又好似有啲唔同, 食到最後一啖都冇厭既感覺, 令一種食材不停保持新鮮感, 呢啲就係高境界!

在下食過無數咁多件鴨肝, 但今次係第一次品嘗到用咁多食材去襯一舊鴨肝既菜式, 驚喜萬分! 在下可以誇張咁講, 黎呢度淨係食呢舊鴨肝, 已經值回票價.

Main Course 主菜:

The must-have “vol au vent”: flaky butter puff ring, in-season seafood, liquorice scented coulis

必試法式 “大餡餅”: 牛油酥皮圈, 時令海鮮, 龍蝦湯

好味程度: 8.5/10

主菜叫左10個黎呢度有9個都會叫既 “vol au vent”, 其實即係酥皮海鮮湯. 網上睇相以為個portion會幾細, Well, 似乎在下又睇錯…一眼望落估計個酥皮ring都有成10cm 直徑.

呢道主菜一上枱就已經攻陷左個鼻, 勁香海鮮味道 (主要係龍蝦湯既味道), 雖然食完個鴨肝已經飽飽地, 但一聞到陣鮮味又當堂醒番晒, 胃口大增.

龍蝦湯鮮味十足, 濃得黎唔太漏, nice! 湯入面有一小舊鱈魚同魷魚. 魷魚唔錯, 彈牙爽口, 亦食得出鮮味. 至於鱈魚就有啲失色啦, 味道冇問題, 但衰左喺Texture… 鱈魚出名夠油脂夠滑, 但在下唔知餐廳點整, 條魚鞋既程度已逹至唔合格既水平...失望...

呢道菜另一個亮點係外圍既酥皮, 已經講過Dalloyau 係做餅起家既, 酥皮當然係上乘質素, 薄, 香, 鬆, 脆! 極品是也! 拎一塊酥皮, 用角落索少少龍蝦湯, 剩係咁食法又已經值回票價,

Dessert:

Artisan cheeses from our cellar, seasonal homemade preserve

芝士拼盤

好味程度: 7.5/10

芝士切得慷慨, 食埋佢就剛好飽到上心口. 至於味道呢, 普通啦, 始終cheese 呢啲野係好personal, 咁啱呢幾款都唔係在下杯茶. 伴碟有幾塊面包同果醬, 唔太夠囉, 在下prefer 有合桃, 新鮮提子, 提子乾, 同最最最緊要既蜜糖. 呢方面The Drawing Room 做得幾好, 不過佢已經執左LU~ I am feeling bad~

友人則叫左朱古力心太軟配雪糕, 聞說一般過一般.

Petit Four

美點雙輝西式版

Price: Included

無論賣相同味道, 都中規中矩吧, 或者因為在下並唔係太鍾意食甜野既原因. 叫做好味啲既係中間正正方方果粒熱情果啫喱, 其他既… well… 可有可無吧…

<DRINKS>

Sparkling Water – Omuse

Price: $85 per bottle

黎自法國既有氣水, 又係俾人明屈既一個項目, 不過餐廳算有良心, 一大枝水都只係收$85, 還好吧.. 通常其他法國餐廳都最少收你一舊水,感謝主吧!

欣賞佢地都叫做有花啲心思喺detail 位, 唔係俾行貨Saint Pellegrino, 老實講, 飲落分唔分得出佢地既difference在下唔敢講, 但見到唔係hae 貨, 總會有點喜悅, 加印象分!

Champagne – Dalloyau NV

Price: $400 per half bottle

好味指數: 8.5/10

自家品牌既香檳, 初初飲落頭果幾啖覺得冇咩特別, 不過愈飲啲味就愈走出黎, 在下幾鍾意, 不過, 講起香檳, 在下飲過最好既都係要數同友人T. Cheung喺Petrus @ 港島香格里拉酒店飲既Pierre Peters, 不過果度索價$300一杯, 都唔同價位, 無得咁比既.

在下並唔係酒痴, 除非枝酒特別出眾, 否則飲落在下只會覺得隻隻都差唔多. 咁點樣先可以投入啲落杯酒度呢? 正如樓上所講, 酒師扮演左一個好重要既角色. 唔似其他餐廳, 呢間餐廳既酒師除左講低左枝酒叫咩名, 黎自邊度, 仲好細心”交帶”番佢既Texture, 有咩香味, 同埋話俾在下知佢會好襯我地個頭盤 – 三文魚同龍蝦 (在下最後飲唔飲得出, 覺得夾唔夾, 呢個唔係重點, 飲得出固然係bonus, 飲唔出亦無傷大雅, 但最緊要係在下可以喺指引下有方向地欣賞俾左成4舊水先得半枝既香檳)

Coffee or Tea – Cappuccino

Price: Included

好味指數: 5/5

在下自有一套對Cappuccino既要求, 泡既volume要佔杯既volume 1/3 至1/4, 泡要夠細滑, 最緊要係texture, 滿分既定義係將粒黃糖放上啲泡度, 佢會慢慢自己沉落去, 如果唔沉代表啲泡太firm, 一野跌左入去代表啲泡太少或太鬆散.

諗番起呢一年, 飲過咁多杯Cappuccino, 都冇邊次係愜意. 幸好皇天不負有心人, 年尾終於遇上, Epure 呢杯泡沫咖啡is my cup of tea!

<OVERALL COMMENT>

野食COMMENT

在下之所以用 "貼地" 黎形容呢餐飯, 除左係佢價錢比出面其他星級餐廳平一截外, 佢既味道同煮法都係"Down to Earth" - 忠實地表逹菜式原始既美味, 鴨肝就係鴨肝, 龍蝦就係龍蝦, 無話咩整色整水. 或者係配菜同配料會玩多少少花臣, 不過大部分都係輕touch, 而佢地堅係用黎儭番個主角, 唔似robuchon, 無論主菜定配菜, 都花過無盡心思, 有時仲妹仔大過主人婆. 簡單啲黎講, 呢度Epure既優點就係唔浮誇, 簡單直接既好味道!

不過略嫌虎頭蛇尾, 有頭威無尾陣, 頭盤做得好好, 主菜既海鮮略為失色, 甜品芝士盤同petit four 更係被比下去, 有點可惜.

至於賣相 (無論係食物擺碟或者銀器碗碟), 都係高級法國餐廳質素, 無咩可彈. 份量呢, 老實講, 如果女孩子黎食4個course, 又叫埋鵝肝同酥皮, 應該會飽到上心口, 不過在下男孩子, 份量剛剛好!

Taste 味道: 22.3/25

Presentation 賣相 (Food & Silverware): 5/5

Variety 種類 (Ingredients & Cooking Ways): 5/5

Portion 份量: 5/5

環境COMMENT

裝修冇得輸, 又係成個法國宮殿Style, 算得上 “金” 碧輝煌. 餐廳有半圓梳化枱, 又有正常四方枱, 加埋塊大玻璃落地窗, 引入出面天然光, 就算餐廳本身唔大, 都唔覺得焗促. 加埋張枱夠大, “空間” 十足!

餐廳唔大會怕焗促, 裝修可以補不足, 不過解決唔到另一個問題: 嘈! 由於加埋樓底唔高, 縱使枱同枱之間既距離夠闊, 你係聽唔到隔離枱講咩, 不過, 真係有啲嘈… 加上我地去果時餐廳係Full house, Well, 人多就然聲多, even 冇大枱. 嘈雜既用餐環同Fine dining 有衝突, 難免扣啲分 (當然未嘈到好似中菜廳咁, 只係相比起其他法國餐廳, 呢度真係相形見拙)

Decoration 裝修: 10/10

Cleanness 整潔 (Dining Area & Restroom): 10/10

Comfort 舒適 (Crowd & Furniture): 7.5/10

服務COMMENT

服務算係高水平, Serve 我地果枱既侍者好專業, 我地問埋晒啲無聊問題 (比如: 鵝肝睇落好吸引, 你覺得我地應唔應該叫之類既低層次問題…) 佢都冇東南北面, 仲帶住笑容 (雖然可能係恥笑緊我地). 不過略嫌佢有少少少少hard sell既感覺, 尤其係upsell 魚子醬果part, chur同熱情只係一線之差.

Booking聽電話時要扣少少分: 餐廳早一日打黎Confirm Booking, 其實在下已經講過好多次, 呢個位千期唔好睇輕, 因為呢個係整個用餐體驗既第二個contact point (第一個係落booking). 佢打黎既時候背景好嘈, 唔講在下仲以為係喺普通酒樓打黎, Well, 對餐飯冇咩大影響既, 但 bad impression 囉…

Product knowledge 食物認識: 5/5

Presentation 表逹: 4.5/5

Attitude 態度: 4.5/5

Attention to details 細心: 4.5/5

Responsiveness 反應: 3.5/5

抵唔抵食?

如果唔叫酒水, 唔叫龍蝦, 唔加錢加魚子醬, 每位索價$438, 以高級法國餐廳4道菜黎講, 呢個價位簡值係親民到 "貼晒地".

連埋酒水最後埋單$1,800, 同出面其他法式高級餐廳差唔多, 或者喺環境同服務上有點點輸蝕, (始終係街檔), 但Epure 喺食物味道上俾到驚喜, 而呢樣野係比較難得, 直到目前為止喺香港在下食得滿意既法國菜就只有Amber, L’ Atelier de Joel Robuchon, Petrus, 同呢度~

我地食甜品既時候已經陸續有其他人黎食Tea, 好奇心驅使下在下望左個tea menu, 嘩!!! 每位盛惠接近4舊水, 同在下既weekend brunch 既價錢爭少少, 但食物質素就爭幾皮啦…

黎食Tea既客人大多係影相呃like吧… 食係其次, 而客人多為三五成群既 (香)港(少)女, 見佢地拎住部電話影完食物又自拍, well, 予欲無言.

執筆之時知道友人開始要向珠寶事業發展, 一面番工一面考證書考試, 本想用呢小小一餐生日飯, 僅祝友人一切一帆風順, 平步青雲. 今日再次落筆之時, 友人已經成功拎到證書, 實在可喜可賀.

呢一餐飯亦都係在下跟閣下既第一餐飯, 往後請多多關照, 佳餚美酒世界係一個黑洞, 係一個無底深潭, 就等我地一齊沉醉落去吧.

<RATING>

FOOD: 37.3/40 (A)

ENVIRONMENT: 27.5/30 (A)

SERVICE: 22/25 (A)

VALUE OF MONEY: 5/5 (A+)

BONUS:

MINUS: -1 (Phone Taking)

TOTAL: 90.8 (RANK: A)

COME BACK? Probably Yes

#finedining