唐閣@朗廷酒店 3星米芝蓮中菜廳, 你啲星星好似拎得唔係好穩喎...
<RATING>
Fine Dining: 85.3/ 100 (Ranking: B+)
食物: B+, 環境: A+, 服務: C+, 抵食: A+
推介菜式: 燒賣, 釀焗鮮蟹蓋, 蜂巢煎封銀鱈魚
回水之作: 帶子松露餃
<RESTAURANT INFO>
Cuisine: 中菜
City: Hong Kong
Tel: +852 2132 7898
Address: 1/F & 2/F Langham Hotel, Tsim Sha Tsui, Kowloon
<DINING INFO>
Date: 11th December, 2016
Time: 1:30pm - 3:00 pm
Meal: Lunch
Pax: 2
With: T. Cheung
Price: $1,150
- Food: $949
- Beverage: $60
- Others: 10% service charge
好朋友生日, 本身打算去L’ Atelier de Joel Robuchon慶祝食個Weekend Brunch, 不過在下喺前一日有另外一個飯局係食法國菜, 加上之後會同呢位友人喺二月頭去食一間新派既法國餐廳, 所以今次餐生日飯就轉一轉吧~
適逄今日十一號, 里數逹人份外留神 (因為有雙倍里數!) 是故要幫襯亞洲萬里通既伙伴餐廳. 要喺果百幾間餐廳簡一間合意既出黎都咪話唔難, 一來佢啲餐廳絕大部份都只係中上水平, 即係比一般既好, 但又唔係最好, 問題係友人嘴刁, 差少少佢都炸晒形, 呢啲大帝最難服侍… 最後簡左尖沙咀朗廷酒店既唐閣, 無他既, 佢拎住三粒米芝蓮星星, 差極有個譜吧…
(利申: 在下一年前已經去過食夜晚, Well, 唔差既, 但冇驚喜, 事隔一年, 唔知佢會唔會拎左個飛躍進步獎呢?)
<餐廳來頭>
唐閣係現時香港兩間3星米芝蓮中菜廳既其中一間, 亦係第三間 (前幾年新同樂魚翅酒家已經由三星被降至兩星~). 餐廳有分店喺上海, 同樣拎到3星, 可以話係一門兩傑, 而且佢係唯一一間喺上海既3星餐廳, 仲要賣粵菜, 喺人地滬菜地頭拎三星, 真係咩風頭都俾佢搶晒. 不過亦因為咁, 唔怪得在下既上海朋友都質疑米芝蓮既客觀性, 劈頭第一句就話: 啲鬼佬邊識評中菜???
<叫野食>
兩丁友食中菜叫餸其實係一件好困難既事, 因為通常啲野係比較大碟, 主要for sharing. 難得中午黎到, 當然以叫點心為主啦, 簡咩點心交俾友人發辦, 另外因為友人牛一, 特別叫隻差唔多成兩舊水既蟹蓋俾佢, 當生日禮物啦 (雖然另外已經有預備到禮物), 最後叫多道蜂巢煎封銀鱈魚 (名菜之一).
題外話: 要一彈既係佢地既點心唔可以逐粒計錢, 就算兩丁友黎食都要叫一籠, 在下個人覺得唔夠彈性囉~ 係, 或者呢個要求睇落好似過份左, 平時喺美心, 潮江春, 好彩飲茶都冇得俾你咁叫, 但同樣係三星, 隔離龍景軒係可以咁做的, 就算之前既一星中菜廳玉蕾都可以逐粒計, 點解人地做到你做唔到? 這樣就被比下去了.
你收一籠點心差唔多成$80蚊, 在下唔介意每粒計但俾番多少少錢, 咁人地真係兩個人黎食啊嘛, 想試多幾款, 而家就做唔到啦… 或者呢啲就係叫Flexibility, 或者呢樣就係四季同其他酒店既分別.
<FOOD COMMENTS>
Menu: A La Carte
蜜汁叉燒包
Price: $78
好味: 8/10
第一道先上叉燒包 (飲茶必叫), 餡既質素唔錯, 份量濃淡剛剛好, 不過略嫌個包有啲啲啲啲啲痴牙, 小瑕疵是也.
燒賣 (推介!)
Price: $88
好味: 9/10
又係飲茶must 叫既點心, 賣相就爭啲, 望落唔多吸引, 不過味道係米芝蓮級數. 蝦係新鮮而且有蝦味 (呢句勁癈… 不過唔好睇小, 出面大把餐廳唔知點解可以將啲蝦整到完全冇味…). 肥豬肉夠滑夠香, 同蝦既比例亦做得啱啱好, 亮點係成粒燒賣唔會搓得太死實, 擺落口之後輕輕一咬就散開, nice!
點解在下話佢有米芝蓮級數? 就係因為佢放面既蝦籽, 一般餐廳會放蟹籽, 果啲真係可以做做 “聊勝於無”. 而蝦籽在下真係第一次見, 佢陣鮮味令成粒燒賣既味道昇華到另一個Level, 抽象啲講句: 畫龍點睛!
帶子松露餃 (回水!)
Price: $98
好味: 5/10
呢個餃就真係唔係幾得啦… 帶子松露餃… 冇帶子味, 又冇松露味, 淨係食到裏面有蝦… 以為自己味覺嗅覺唔夠敏銳所以食唔出, 但係友人都係同一反應… 是故一致認為貨不對辦, 並且榮登今餐最差既一道菜.
釀焗鮮蟹蓋 (推介!)
Price: $180
好味: 10/10
一隻索價接近二百既蟹蓋, 喺網上睇似係名物之一, 但由於在下係貧苦打工仔, 俾四舊水出黎會好肉痛, 所以決定淨係叫一隻俾友人, 壽星仔嘛~
點知上到枱時侍者主動提議幫我地分開一半for sharing, I see~ 原來份量都幾大, 講真, 一個人食係食得晒, 但兩個人分享似乎更好 (體驗美食之真諦: less is more~ less portion is more delicious~ haha 在下作既~), 不過, 其實分左一半之後都仲有4份之3既手掌咁大, 所以係夠食的.
呢度既蟹蓋又係襯到三星米芝蓮個名, 做得超好! 面頭既吉烈脆脆夠薄, 食落唔會成口粉, 不過呢個都係基本野. 重點係個餡, 望到入面之後不禁同友人都嘩左一下: 喂, 堅足料喎!!! 出街平時食既蟹蓋大部份餡料係白汁, 煙肉, 洋蔥, 等等non 蟹肉 ingredients~ 而喺呢度, 蟹肉終於擔正做主角, 而且仲要係勁多戲份果隻. 一疏疏既蟹肉, 充斥成個蟹殼, 蘊藏超強既蟹鮮, 真係正到冇朋友!!! 配料有極少量既洋蔥, on side 有喼汁, 志在黎吊一吊味, Top up 番成件事.
同友人食到嘴lam lam, 直樹舞子! 雖然$180一客好似幾貴, 但愈食愈發現真材實料, 抵啊! 愛蟹之人不容錯過, 在下誠意推介!!!
蜂巢煎封銀鱈魚 (推介!)
Price: $450
好味: 9/10
黎得三星餐廳, 總要見識一下大廚既真章, 點心只係粵菜既一小部分, 未試到真功夫, 所以在下一早喺網上搜集資料睇下唐閣有咩名菜. 見到其中一篇報道, 大廚鄺師傅介紹餐廳既招牌菜就係呢道鱈魚: “菜式用中式烹調方法, 先將銀鱈魚用火燒熟, 用灑上藍苺汁及玫瑰露, 就能成菜”. 既然係大廚親自介紹, 在下即管叫上一客, 驗證三星威力!
上到枱, 賣相終於似番啲三星級數: 精美既刀工將青瓜切薄片, 再砌出一個栩栩如生既士多啤梨 (尤其係啤梨頭殼頂既果執草), 真心覺得靚~
味道方面, 肥美既銀鱈魚, 細心處理後冇晒雪水同雪味, 剩番魚油同魚香. 經過前封之後, 外面係帶濃郁醬汁味道既脆皮, 十級惹味, 而咬落口依然食得出 “一界界” 既白滑魚肉, 高質是也, 友人同在下都讚嘆不絕. 不過你話有藍苺味在下就唔係太食得出啦…
伴碟有炸芋角, 喺魚同魚中間作一個重口味既中場休息, 友人麻麻地芋頭, 所以佢食一粒, 其餘三粒由在下包辦, 好味!
不過兩個人黎食呢度名菜好似有啲Heavy, 鱈魚一共有八粒 (麥樂雞size), 連埋四粒炸芋頭, 食到一半都有啲濟, 或者4個人黎先叫呢度菜就差唔多.
棷汁紅棗糕
Price: $55
好味: 8/10
好香紅棗味, 但中間果pat白色棷汁好似冇咩味喎… 食黎食去都係得紅棗, 友人有少少失望 (因為佢expect會有超濃棷汁味先叫呢個甜品). Anyway, 在下欣賞佢喺糕上面放左幾粒細小既乾紅棗, 做賣相點綴之餘又可以create 唔同texture, nice!
<DRINK>
茶芥: 潽洱
Price: $30 per person
<OVERALL COMMENTS>
野食野飲
味道整體黎講算唔錯, 大部分菜式同點心都屬於高水平之作, 燒賣, 蟹蓋, 銀鱈魚更可竊見大廚功力之一斑. 不過你話好驚喜在下又唔多覺喎… 所以如果你話咁樣都值三粒米芝蓮星星, 在下就會鄧最喜愛既名人坊高級粵菜唔抵啦… 人地個生炸妙齡乳鴿, 牛腩煲, 富哥炒飯, 琵琶豆腐等等等, 真係可以好食到暈低! 或者學好多其他食評人話齋, 米芝蓮評審團始終大部分都係鬼佬, 佢地識鬼評中菜咩?
名人坊高級粵菜既Dining Review喺呢度
少少改善空間for 唐閣: 點心既賣相真係有點兒那個, 唔係話食物本身賣相差, 而係擺位問題… 餐廳做門面野, 將個蒸籠放入一個高貴既金鋼罩上枱, 但就求3x3其擺到歪黎歪斜, 個籠唔喺個罩中間不特止, 連啲野食都偏埋一面, 你唔講在下以為係廚房局部性地區地震… 喂… 如果你係樓下間彩福在下唔理你, 但你三星喎... 係唔係對自己應該有啲要求呢???
環境
比起其他高級中菜廳,在下其實更愛呢度既裝修. 唔似龍景軒, 欣圖軒, 明閣, 呢度唔行光猛簡潔路線, 而係用上沉色既地毯同窗簾, 帶點 “人在深宮” 既感覺 (如果有睇黃金甲, 大概就明白在下既意思了), well, 個人係喜歡呢type的~ 餐廳有兩層, 中間有條旋轉樓梯, 感覺上好似幾高級.
今日中午全院滿座, 而在下附近都有一兩張大枱, 故不時有啲突如其來既大笑聲, 其實OK既, 反正枱同枱之間算隔得幾疏, 基本上唔太大影響.
唯一要彈既, 就係在下又唔好彩 (似乎高級中菜廳剋住在下), 今次被安排坐喺廚房出菜位, 雖然餐廳已經好細心用塊屏風間開我地, 不過始終係廚房, 果啲嘈音啊, 侍者同侍者既溝通啊, 都有少少擾人. 不過情況唔算太惡劣, 都未及當日喺福臨門坐 “屁屁位” 既十分之一.
福臨門既Dining Review喺呢度
服務
呢個無論如何都要彈一彈, 既然話自己係五星酒店中菜廳, 三星米芝蓮, 服務呢一欄就真係只可以話係剛剛合格. 喺絕大部分既侍者既身上都搵唔到親和力 (去到後期有一位男侍者好啲啲), 唔夠主動, 無笑容, 欠缺細心通通都係呢度既毛病… 係~ 在下承認可能係唔太公平, 在下係用緊四季酒店龍景軒去做比較… 之不過, 個個都係咁比架啦~
似乎喺呢個環節餐廳要落番多啲心機, 否則 “摘星” 指日可待…
又係彈: 餐廳學龍景軒學得最足就係用個燭台暖住個茶壼, 然後擺到無雷公咁遠, 之後壼炳既方向就向住出面, 諗住sell service等客人唔駛自己斟茶… well… 一開頭還好, 去到中後期已經冇人得閒黎斟… 其實呢, 老實講, 在下自己斟番冇咩所謂, 反正呢啲係簡單野, 但你一開始就擺個到壼咁Q遠, 咁人地就有期望架啦.
題外話: 呢個咁高難度既動作在下第一次遇到係喺龍景軒, 然後其他高級中菜廳開始東施效顰, 但咁耐以黎, 就真係只有龍景軒可以做到唔駛自己斟茶, 你飲完一啖之後好快有侍者幫你斟番 (而家既情況在下唔肯定, 但起碼對上果兩次去都係拎滿分) 至於其他餐廳…唉…自暴其短.
抵食
千一蚊飲餐茶, 聽落當然唔抵, 不過考慮番隻足料蟹蓋, 高質炸鱈魚, 配埋環境 (服務就唔計啦), 重點係有里數賺, 總體黎講係超抵既!
亞洲萬里通
Langham Group 旗下既餐廳大部分都係亞洲萬里通Asia Mile 既合作夥伴餐廳, 消費2蚊就賺一里, 加上今日係11號, Double 里數! 所以呢餐飯食左$1,150, 咁就輕鬆膁左接近1,400 里 (當然計埋用左Sammi果張信用卡), 變相令到餐飯抵食好多!
<RATING>
FOOD: 35.8/40
ENVIRONMENT: 29.5/30
SERVICE: 19/25
WORTHNESS: 5/5
Bonus: ~
Minus: -3 (坐喺出菜位隔離), -1 (Flexibility)
TOTAL: 85.3 (RANK: B+)
COME BACK? Not Sure
