About This Blog

在下路易斯 LOUIS,幸會幸會,多多指教 orz

最鍾意去試食果啲所謂 “高級餐廳”, “米芝蓮餐廳”, “Fine Dining Restaurants” 之類既東東.

主要跟住Restaurant Magazine既 “100 Best Restaurants in The World” 同 “50 Best Restaurants in Asia” 黎開飯. 亦會參考米芝蓮既星星推介. 其他食評例如Trip Advisor, Openrice 之類, 有時間都會望下既….

食評? NO!

呢度既食評, 嚴格黎講, 唔算係食評. 一黎唔只關於“食”, 二黎在下都冇異於常人既舌尖, 未有資格去“評”. 所以且叫呢度做Dining Experiences Sharing吧~

Dining Experience於在下而言, 三個元素: Food食物, Environment環境, Service服務.

咁者係食裝修,食賣相,食服務啦….對…你講得冇錯... 在下個人係好欣賞紅磡海名軒玉蕾既千萬裝修, 四季酒店龍景軒既真正五星服務, 洲際酒店扒房既十把出名扒刀, 在下認為以上既野係會直接影響成餐飯既體驗, 間接仲影響埋味道添~

客觀性: 1%

有別於其他食評, 此blog極為主觀, 純粹個人意見.

而評分係會受到天時地利人和既影響… 例如食飯果日天氣唔好~ 天陰自然心沉, 評分可能會低D…又比如餐廳地點唔就腳, 行到身水身汗, 心情差, 又手緊D…

反覆嘗試以逹致更為準確既評分, 呢種專業試食精神, 喺呢度…是沒有的. 一次定生死, 食完唔開心, 下次會去第二間,冇必要俾錢再買難受.

至於果1%既客觀, 源自於用餐體驗評分係綜合左在下同一起進餐既友人既評分….多個人….叫做稍為客觀點啲吧……

餐廳覆蓋範圍: 好很低

你如果問…點解成個blog淨係得果啲“高級餐廳”???

因為食物本身只佔評分其中三份一, 仲有環境同服務. 話之你食物再好味道, 只要裝修唔順眼, 坐得唔舒服, 食飯要搭枱, 隔離條友講野太大聲, 個侍應講漏左句唔該, 臨走唔記得SAY GOODBYE, 都會拖低晒成個分數…到時所有平民美食都攞S級…就無癮了.

當然, 如果要爭拗澳奶侍應既馴獸召喚俾到你窩心感覺, 又或者你認為旺角添好運既背貼背坐人模式同樣令你舒舒服服,那就當在下膚淺吧….

評分制度

評分由3部分組成, 裏頭再分拆, 然後又分拆, 呢度就唔一一寫出啦...)
旨在話俾大家聽…其實在下評分都有準則既, 唔係亂Q咁評…

注意, 評分係評個Experience, 唔係評間餐廳, 同樣既菜式服務, 今日評分好過尋日, 好簡單, 可能尋日俾老細罵完, 心情唔靚囉~

食物 (總分40分) – 味道, 賣相, 種類, 份量

環境 (總分30分) – 裝修, 整潔, 舒適

服務 (總分25分) – 專業, 表逹, 態度, 細心, 反應

價錢 (總分5分)

大概咁上下啦….

評分由S到A+:

A+: 96-100 分 A: 91-95 分

B+: 86-90 分 B: 81-85 分

C+: 76-80 分 C: 71-75 分