山の茶屋 - 箱根 私人露天風呂付溫泉旅館 高檔推介 (yamanochaya)
旅館Info:
Name: Yamanochayo 山之茶屋
Ranking: Luxury Ryokan Collection
City: Hakone, Tokyo 東京箱根
Address: 〒２５０-０３１５ 神奈川県足柄下郡箱根町塔之沢１７１
住宿Info:
Check-in Date: 5th July, 2016 (Tuesday)
No. of Night(s): 1 night
Plan: 一泊兩食
Room Type: 特別室 姬沙羅 Himeshara
Pax: 2
Price: 76,332 yen (HK$5,800)
跟友人去日本, 最後一日編排去箱根玩半日, 加住多晚溫泉旅館, ultimate放鬆一下自己, 同時幫成個旅程畫上最完美既句號. 箱根靚既旅館多不勝數, 在下不孝, 住過出晒名貴既強羅花壇同箱根吟遊, 呢兩間野真係正到無論, 唯一缺點係真係好乸貴 (肉痛到在下諗番起都唔覺意講野粗魯左), 所以今次冇能力翻桌呢兩間.
當然, 豐儉由人, 平有平住, 喺箱根平既旅館大X把, 但在下實在唔想spoil左成個旅程既最後一天, 故再次忍痛簡左呢間高不成低不就既既山之茶屋. 話佢平同抵住, 真係仲難聽過操口, 但貴又唔夠樓上果兩間.
<訂房>
先講訂房, 旅館有英文網站, 跟住啲指示輸入資料就冇問題~ 訂完之後, 就會有確認email 腥番俾自己, 再隔一陣就會有另一封email叫你make payment, 都係跟住指示入番credit card資料就可以了.
不過唔知咩事, 在下張信用卡唔係太Work, 過黎過去都過唔到條數, 跟住在下唯有send email同旅館解釋番件事, 旅館好好人回覆答可以到時check out再找左條數, 不過當然要俾定啲信用卡資料佢地做guarantee.
P.S. 用英文寫email俾佢地係冇問題的, 對方有人識洋文, 好方便!
<如何去旅館>
由於在下同友人打算早啲去箱根行下街食個lunch, 所以提早去旅館放低行李先.
由新宿搭小田急箱根romance car由新宿直接去箱根湯本駅 (車程大約1.5小時), 然後喺箱根旅客中心出面 (exactly喺個湯本站對面) 有旅館小巴坐. 架小巴由1315 run到1745 (禮拜六run到1845), 每逄15分同45分開車. 有A,B,C 路線, 每條路線去唔同地方, 山之茶屋係喺C路線 (往塔之沢方向). 每位盛惠100yen, 司機會喺上車前問定你去邊間旅館. 車程大約10分鍾.
P.S. 注意, 小田急箱根列車係冇位放行李, 如果有大型行李, 係絕對好唔方便, 因為冇位俾你擺, 好彩在下去既時候架車好吉 (可能訂左貴卡…大約每人4千幾yen來回), 同友人分開坐然後再放行李喺隔離位… 但如果滿座既話, 真係會好頭痕… 所以建議大家可以將行李留喺原先既酒店, 輕裝上箱根, 番黎先拎番行李, 或者最簡單, 自駕遊吧!
P..S雖然旅館近塔之沢站, 但好似要上山落山, 而拎住行李係做唔到呢件事的, 故在下都係建議一係搭旅館小巴, 一係打的 (大約1千yen)
落左小巴第一樣出現既野就係呢度俾好多樹包圍住, 果然係 “山”之茶屋, 第二樣野係…一條長命斜…
條斜路唔好睇少, 都有20-30度傾斜, 長度有成30米. 拎住個袋同大喼, 加上落緊小小雨, 地下又濕, 咁樣拎上去都幾係野…. 上到去, 頂! 仲有幾級樓梯… 幾經辛苦終於到逹門口, 由於時間倘早 (大約1230), 所以冇人黎接駕, 得女主人咁啱坐喺大廳度, 在下打聲招呼同佢交低行李之後就出番去湯本駅玩.
<出番去>
問題又黎啦, 點出番去呢??? 當然可以等下一班旅館小巴黎, 但等成20幾分鍾, 女主人建議我地搭巴士, 個巴士站唔遠, 旅館行番大街然後行多50米到, 但煩在冇行人路, 係條馬路黎的, 落雨天拎住把遮喺啲車隔離行, 都唔係好滋味… (如果係內地, 咁行法, 撞你唔死是奇蹟...oops…不覺意又黑了別人)
P.S. 搭巴士教學: 好簡單, 基本上啱方向既所有巴士都經湯本駅, 上車時拎張車票 (一定要拎!! 唔係就收你全數架啦…) 到落車時, 去車頭, 入番張車票同埋exact數量既散子就搞掂. 如果冇散子, 佢有部紙幣找零機用黎唱散子. 放心, 好似好複雓, 但日本巴士司機好好人的, 你只要擺個 “諗樣” 出黎, 佢會好主動幫你~
出番去湯本駅, 食左個日式定食lunch (在下食吞拿魚丼, 友人食天婦羅丼, share左個豆腐煲) 普通野, 值得一讚係份量十足…因為在下食唔晒…
行左陣街買好手信都差唔多四點幾, 係時候番旅館休息, 本身想搭番旅館巴士, 但個天落緊雨加上在下唔生性…所以搭的士…哈哈, 大概8分鍾路程, 盛惠1,000yen (人有時總要放縱一下自己, 對不對?)
<旅館Check in>
的士到逹後, 在下以為自己皇帝出巡, 3個旅館侍者即刻狗秒狗衝左出黎, 包圍架的士, 2個人分別打傘遮在下同友人, 另一個強搶在下手上一袋二袋既手信… 突然受寵若驚, 唔識反應…. 咁大個人都未試過同一時間俾咁多人服侍~
入到旅館坐低後, 女主人用流暢英文介紹完成間旅館 (比如邊度喺bar, 大浴場開放時間男女交替啊, 問好晒早晚餐時間同聽日點樣走, 駛唔駛幫你叫定的士之類…) 之後就由另一個侍者帶領我地入房間~
我地間房叫姬沙羅, 屬於有露天風呂既特別室. 間房唔算大, 但兩丁友訓, 夠瞓便是了, 間隔好簡單, 一廳一房一風呂.
侍者介紹完間房之後 (比如電話收埋左喺邊, 邊度有浴衣) 就叫我地坐低等一等, 等佢奉上埋和菓子同綠茶, 再確認一下食夜晚既安排~
晚餐最遲係6點半開始… 對香港人黎講真係唔太習慣…在下平時6半先剛放工, 9點先開飯. 不過, 早啲食飯可以早啲休息, 然後幫自己認真叉足一晚電!!!
<私人露天風呂>
食飯前在下浸左個溫泉. 而沖涼位置就exact7ly喺個溫泉隔離, 舒舒服服沖個熱水涼, 然後跳入溫泉, 望住啲竹樹享受人生. 一路浸, 一路呷住杯緑茶, 其實, 人生應該係咁~
睡房同溫泉之間係可以落簾的, 咁就唔怕俾人睇蝕啦~
注意: 沖涼位置放喺室外唔係一個Good Idea, 果時大約20度, 但已經覺得好Q凍…
<晚餐>
特別房既好處係, 早餐同晚餐都係喺房食. 所以如果玩自閉, 由check in 到check out 都可以呢埋喺房, 一步都唔駛行出去, 超正!
先上開胃酒 (係一杯好醇既清酒)
凍緑茶: 終於有旅館識俾啲非酒精飲品for thru out the meal… 好多時候啲旅館miss左呢part, 水都冇杯…
先八寸 (前菜): 美輪美奐, 樣樣都好味! 好既開始係成功既一半.
由左至右, 上至下, 分別有~
1. 中國燈籠: 迷你蕃茄配芝士, 薯蓉, 乾火腿
2. 青瓜配魚子醬
3. 秋葵mix日本山藥配蒸海膽及野苺
4. 甜蕃薯(用燈醃過)
5. 炸淡水小蝦
6. 鱈場蟹蛋黃壽司 (用蟹肉卷住啲蛋黃)
7. 芝麻豆腐 配腐皮, 豆同Wasabi
椀盛 (湯) 清新木魚昆布湯: 粒丸係用帶子, 魚肉, 同蛋白mix 埋一齊, 正常湯品.
造里 (刺身) 有石碟(白身魚), 鯛魚, 同中拖羅: 刺身不嬲都係日式旅館既強項, 新鮮肥美!
蒸物 蒸海鱸魚配蛋白: 滑身就稱唔上, 不過有魚味, 蛋白夠滑補番數, 加埋佢個汁夠惹味, 白菜同wasabi用黎refreshing, 不失為一道佳餚!
組肴 (主菜) X 2
第一道係Ayu: 原條魚插落啲緑葉度, 賣相的確一流. 呢款魚夏天剛好當造, 醃好後再燒. 友人嫌佢太腥, 在下則覺得還可以接受.
第二道係海陸大雜綿: 有炸矮瓜, 和牛, 燒鰻魚, 燒鯛魚, 蝦, 蔬菜等等等…, 雖然每樣都幾好食, 但將佢地放埋一齊就好似怪怪地.
食事及酢物
八爪魚蒸飯及醃物: 每次食懷石料理都必有既米飯, 喺餐飯開始前已經問左我地要邊款, 二選一 (either八爪魚飯or白飯配魚子). 最後跟友人都係簡左前者.
結果, 普通野, 無咩特別, 因為八爪魚本身冇咩味, 帶少少鹹而已, 不過配埋啲醃菜都算唔錯.
水菓子 (水果)
水果啫喱: 水果係日本名物, 樣樣都甜. 今次我地杯野有巨峰提子, 枇杷, 西瓜, 撈埋芒果汁, 真係甜到冇朋友, 好味到一野食晒都唔記得影相~
食飽後抖一陣就瞓個早覺, 一覺瞓到聽朝~
<早餐>
早餐最遲食8點, 係傳統日式早餐, 有白飯, 燒魚, 芋頭, 面豉湯, 醃物等等等~ 算好豐富, 不過口味偏地道, 未必個個鍾意.
食完早餐執埋行李就差唔多Check out (最遲10點Check out), 的士已一早安排好, 由館車番去箱根湯本駅, 再搭番小田急浪漫快車番新宿~
<一泊COMMENT>
房間算唔上超豪華 (當然唔能夠同強羅花壇同吟遊作比較), 但大小適中, 五臟俱存, 旅館應該剛剛翻新過, 啲傢私都好新淨, 床鋪以至枕頭都好舒服. 房間設備亦都好齊全, 緑茶啊, 電視, DVD機 (出面走廊有得免費借DVD睇, 咁就唔怕悶啦), 收得好好既WIFI (免費), 拖靯, 浴衣之類之類既野都十分齊全.
最欣賞係個私人檜木風呂, 四四方方夠晒大, 打橫打直浸都好夠位! (估計大約有1.3 米 x 1.8米.)
要彈既會係景觀, 成間房就只有睡房既落地玻璃, 仲要俾一排竹擋住. 如果加番個山景就好多了. 另一樣要彈既係交通真係唔太方便 (除非閣下自駕遊), 出入要靠旅館巴士或的士, 而且旅館如其名, 山之茶屋, 佢真係匿埋喺個山度, 附近咩野都冇~
倘若筆直所限, 簡左間無私人風呂既房間, 旅館仲有大浴場, 偷偷地影左幅相, 個景一流!
啊! 漏左一樣緊要野, 由於旅館唔太出名, 房又唔多, 見唔到我國同胞, 住既全部都係鬼佬同日本Local… Umum, I will treat it as a compliment…
<兩食COMMENT>
晚餐同早餐都係傳統旅館日式style. 晚餐有少少有頭威冇尾陣, 由先八寸食到刺身都好味, 但燒魚, 主菜, 米飯卻有點失色, 雖然去到生果環節又變番 “正菜”, 但亦感無法力挽狂瀾, 是為今次住宿其中一個遺憾.
利申: 在下係食開米芝蓮級數既餐廳, 故要求係高左少少…
<Japanese Hospitalityおもてなし>
呢方面真係冇得輸, 由帶我地入房, 到介紹成間房既Details, serve我地晚餐同早餐, 一直到離開旅館送我地上的士, 都係一個過左60歲既 “婆婆”. 佢知道我地日文唔掂, 佢都用佢僅有既英文同我地溝通, 盡一切可能解釋每道菜式, 絕對唔會話因為言語不通而草草了事就算.
唯一有啲唔習慣既係食晚餐既時候, 在下同友人大人大姐撓埋雙手坐喺度, 而佢就要由房門口慢慢將每道菜拎埋黎放上枱, 有時啲器皿重到佢都拎到手震震, 一路震就一路端上黎, 然後就以笑遮醜. 雖然在下幾次想出手, 但感覺上都俾佢婉拒左, 或者呢啲就係日本人既執著.
臨離開旅館前在下都專特登同佢影幅合照留念, 感謝佢再次令在下確切感受到何謂 “おもてなし”!
<Worthiness>
港幣5千8蚊住一晚, 點計條數都係貴, 不過考慮到可以住到咁靚既房, 感受到親切既服務, 難得既寧靜, 比起同區算好大既私人風呂, 加上仲要係Peak Season, 呢個價位算係咁.
不過, 都係果句, 一係唔好去, 一去我就要最好, 下次儲夠彈藥, 住番強羅花壇-葵房間 (這是在下平生住過最好既日本旅館)
<Rating>
Accommodation: 34/40
Dining: 36/40
Hospitality: 8.5/10
Accessibility: 3/5
Worthiness: 3.5/5
Bonus: +3 (60歲婆婆)
Minus: Nil
TOTAL: 88 (Rank: B+)
