琉球溫泉瀨長島酒店 - 沖繩溫泉酒店優閒推介

旅館 INFO:

Name: 琉球溫泉瀨長島酒店 Ryukyu Onsen Senagajima Hotel

Ranking: N.A..

City: 沖繩

Tel: +81 098 851 7077

Address: 沖縄県豊見城市字瀬長174-5

Website: http://www.senagaspa.jp/

住宿 INFO:

Check-in Date: 23rd April, 2016 (Saturday)

No. of Nights: 1

Plan: 一泊兩食

Room Type: Standard Twin (Airport View)

Pax: 2

With: S. Lam

Price: 46,000 Yen (23,300 yen x 2 persons)

搞event忙左幾個月, 爭啲chur死自己, 想同好朋友出國輕鬆下, 抖啖外國空氣, 順便做下運動, 舒展筋骨, 所以黎個短線3日2夜遊. 有考慮過台北, 不過普通話既世界似乎冇咩異國風情, 有諗過曼谷嘆下四手按摩, 不過又唔想剩係屈喺酒店, 所以最後拍板沖繩~

沖繩呢個地方友人同在下幾年前一齊去過 (當時仲玩埋浮潛), 舊地重遊, 大路景點可免, 冇check point, 冇check list, 今次既旅程堅係志在散心.

P.S. 友人覺得喺外國跑步係一件好型既事, 今次就圓佢心願~

<如何去旅館>

今次貪平坐bitch airline.... sor... 係peach airline, 一時手快講錯, delay 少少大約四點到逹機場, 由於bitch係廉航關係, 所以落機terminal都係廉terminal... 一入到去以為自己去左第三世界既機場... 不過唔緊要啦, 小小野係唔會影響到在下去度假既心情~

咩料...棟野係臨時搭出黎既下話...

去到terminal, 要自己主動 (係冇任何客服指示) 搭一架接駁巴士去國際terminal, 然後再諗辦法先出到城. 旅館本身有免費Shuttle bus (赤嶺駅上車), 詳細資料可參考其官方網站 http://www.senagaspa.jp/jp/access/index.html 不過在下同友人費事煩, 加上佢既班次又唔太密, 故直接由機場打的過去~ 機場有兩條的士隊, 一條長途, 一條短途, 而呢間旅館其實exact7ly 喺機場隔離... 唔駛審, 短途des~ 車程大約十分鍾, 埋單1000 yen, 70蚊港紙... 濕濕碎, 豪俾佢啦~ (的士起步價為500 yen, 比起東京700 yen起標, 抵搭好多!)

<旅館Check-in>

一落的士, 旅館即刻有人黎接車, 幫你開車門, prompt你去check-in counter~ well~ 呢D基本野吧~ 呵呵呵~ 然後職員好細心同你講低晒你book左咩plan, 晚餐同早餐既安排, 溫泉入浴時間同需知, Wifi... 等等, good, 夠細心! 夠晒長氣, i like it!

旅館大堂夠晒光猛開掦, 有手信店, 有露台仔. 一個靚既大堂, 係質素既保證~ 門面野嘛, 如果連門面都唔掂, 九成九肯定係敗絮其中~

旅館正門

<房間>

今次住既係最standard既twin房, 冇包到私人風呂. 間房唔敢講好大, 連埋廁所露台大約300-400呎, 不過空間感十足, 而且用上木地板, 夠warm~

一D都唔逼

附上浴衣睡衣 (俾你著住喺旅館內移動)

夠位放得落張梳化

得物無所用既浴缸, 因為沖涼會去大浴場

<旅館周圍>

check-in完又唔想咁快去浸溫泉, 就去左旅館附近打個轉, 食個afternoon tea, 順便為聽朝環島跑踩下線... 旅館有一條樓梯直落山下一個新開發既遊客區 - Umikaji Terrance.

Terrace大約分成四層, 每層都設有商鋪食肆, 又有幾個common area, 放左幾張梳化, 俾你攤抖曬下太陽, 聽下live band, 睇下黃昏. 仲有D用餐桌椅, 方便遊客自己帶野食黎享用, 夠晒relaxed... 在下都喺度虛耗左半個時辰既光陰~

真心覺得有D希臘風情

<溫泉-大浴場>

呢間旅館標榜自己係島內唯一既真溫泉, 仲起左個好勁既名 - 龍神之湯~ 咁究竟是龍是蟲呢???

溫泉入口有個counter, 住客要報上自己房號 (因為外來客人都可以俾錢入黎浸), 然後工作人員派毛巾. 跟住就入得去除衫沖涼浸溫泉. 溫泉區一共分6-7個area:

下圖左面有蓋既係立浸 (即係企喺度浸, 水深1.2米), 浸過咁多間旅館, 第一次企喺度浸, 腳底鋪滿石春, 順手做埋腳底按摩, 又幾過癮~

右面冇蓋既係坐既, 正常野.

仲有三個紅色兜, 自己浸自己, 不過由於周邊有其他人, 較難做到悠然自得.

此外, 仲有2個桑拿室, 一個濕蒸 (裏面冇咩燈光, 成個神秘太空艙, 艙內瀰漫薰衣草香味, 又冇咩人去, 在下極力推介) , 一個乾蒸 (裏面由於有太多肉帛相見既麻甩佬, 所以在下skip左).

最後仲有一間房, 裏面有個男人做緊massage, 奇就奇在...個技師係女既... 行出行入間房都會經過成班男人, well... 在下係俾人望既都覺得唔好意思, 人家女孩子...情何以堪呢?? 友人答道: 人地有咩未見過, 區區小蛇, 何足掛齒... 又啱Wor...

總括黎講, 呢度溫泉既優點係地方尚算寛敞, 180度海景, 下身浸住熱水, 上身吹住海風, 係爽既, 抵佢咁出名. 而缺點就係...太出名... 老實說, 都幾多人, 尤其係D 飯後時間, 早餐前夕, 都成差唔多20幾人喺度浸緊. 四月仲未算旺季, 去到六至九月超級旺季時, 成個溫泉充斥住光脫脫既大男人ssss, 似乎呢個並唔係一心想黎relax既人想見到既畫面.

Sor...在下呢D去慣白濱海舟獨立屋, 箱根強羅花壇, 箱根吟遊既享受派, 似乎都係要stick番to啲有私人風呂既旅館~ 費事俾人睇蝕晒~ 哼~