Catalunya - 慶生一流既西班牙餐廳
RESTAURANT INFO:
Cuisine: Spanish
City: Hong Kong
Tel: +852 2866 7900
Address: G/F, Guardian House, Morrison Hill, 32 Oi Kwan Road, Wanchai
Ranking: N.A.
Website: http://catalunya.hk/
DINING INFO:
Date: 27th July, 2016 (Wednesday)
Time: 7:30 pm - 9:30 pm
Meal: Dinner
Pax: 4
With: R. Ho, E. Chung, C. Chung
Price: HK$3,400
- Food: $2,493
- Beverage: $550
- Others: 10% service charge + Tips
友人生日, 例牌我地會簡間好餐廳慶祝一下, 4個人最好share黎食, happy together! 中菜大家己經食到悶, 日本菜又難叫野食 (通常高級野都係每人一個貴Set), 唯有西餐啦, 西班牙菜就fit晒, 可以叫tapas, 又可以叫paella, 最啱三五知己share把酒言歡.
今次係在下第二次黎食, 第一次好似係幾年前剛開業, 果時真係日日都爆場, 淨係booking都要排幾個月. 不過, 香港人係 “三分鍾熱度”既俵俵者, 當日既排booking已經不再出現, 都好既,在下都想享受一下寧靜既用餐環境.
講番間野, 認真唔就腳… 位於灣仔同銅鑼灣交界, 唔爹唔吊… 最近既地鐵站出口係銅鑼灣A出口(時代廣場), 再行多10至15分鍾, 間野就喺灣仔學校附近. 好彩果日唔算太熱, 唔係既話都幾係野…
一入門口, reception 姐姐就即刻approach我地, 簡單greeting就prompt我地去到張枱. 張枱一半梳化位, 一半係兩張櫈~ good! 在下最憎坐梳化, 個人愈坐愈攰, 無辦法了…人大左..
坐低後指定動作, 叫水, 例牌sparking water. 水黎自西班牙, finally, 唔係再係San Pellegrino… 真係飲到悶 (雖然其實未必分得到唔同水既味道, 心理作用吧). 然後就叫多一渣Sangria,呢啲餐廳點都要叫啲酒飲~ 基本禮貌, 做個樣都要.
至於食咩, 雖然佢有Setup Menu, 但4條友, share 食開心好多. 所以決定a la carte, 當然, 又係在下發辦~
FOOD AND BEVERAGE
Menu: A La Carte 散叫
Appertizer: Foie Gras « Ferrero Rocher » 鵝肝"金莎"
HK$22 each
今晚第一道菜, 望落似金莎, 食落口既感覺其實exactly 就係一粒金莎, 只係裏面既榛子醬轉左做淡身既鵝肝醬. 朱古力既香甜加埋鵝肝鹹香, 夾唔夾就真係見仁見智… 友人 sss似乎唔係太欣賞, 而在下則覺得試過就算.
特別一 提既係, 盛載呢粒金莎既食具竟然係一隻 神之手~ 正啊 !
Appertizer: Pa Amb Tomaquet 蕃茄多士 + Lomito Iberico 西班牙火腿
HK$80 + HK$145
火腿都分好多級數, 而咩level主要取決於佢地既肥瘦程度, 正常既iberico在下食得多, 今次特登試下個lomito (一啲比較瘦既部位). 另外跟埋個蕃茄多士, 咁就唔會淨係食火腿咁Dry.
Lomito食落 的確冇咁肥, 油份都比較少, 而且比較有趙口, 配埋蕃茄多食都算唔錯. 學友人話, 呢啲火腿食第一啖冇咩野, 但愈食愈想食落去, 停唔到口.
經理好好人, 特登切少少貴果隻iberico 俾我地試食做下比較. 老實講, 好似我地呢D平時少食火腿既人士, 貴iberico 似乎更深得我地心.
提外話, 經理佢仲好熱心解釋貴價iberico因為比較油份多同軟熟所以可以用手切, lomito就係用機器切, 而機切既時候所產生既熱力同時會將啲油份融解左, 所以瘦上加瘦.
Appertizer: Avocado and Lobster Roll 牛油果龍蝦卷 (推薦!)
HK$230
呢道既名物之一, 用薄切牛油果卷住蟹肉同龍假肉, 上面再放啲三文魚子.
先唔講味道, 淨係賣相都一流 ! 友人細心將佢再細分4份, 一啖擺晒落口, 強勁既蟹鮮奪腔而出, 緊接既係彈牙龍蝦肉, 最後用牛油果既滑溜完事, 而每一啖都夾集住三文魚子既咸鮮! 有冇咁誇 ??? 當然...係冇既, 哈哈, 你估拍緊食神咩~ ? 不過好味就真既.
我地4人一致讚好, 認為今晚最出色既菜式 !
Appertizer: Bikini 比堅尼
HK$135
名物之二, 其實呢件野做法好簡單, 只係一塊烘底多士, 放芝士火腿同埋松露醬, 咁就色香味俱全. 松露香唔駛多講, 火腿同芝士 (仲要係鬼佬芝士加洋人火腿)本身就係一對. 所以點會有唔好食既理由 ?
Main Course: Traditional Suckling Pig « Segovian Style» D.O. Teruel 3-4 Pax 西班牙乳豬
HK$895
由於第一幅相有少少殘忍, 故後期加工加左少少野落去, 望落去好似舒服啲…好似係, 應該係…
終於到主菜, 烤半隻西班牙乳豬. 餐廳傳統會用隻碟切開隻豬, 以示隻豬夠嫰夠淋, 而最後一個部驟就係將隻碟掉落地, 落地開花, 富貴榮華 (不過, 我地坐main dining room, 附近又有其他食客, 掉碟呢part 就skip左了, 費事玻璃碎整親其他人... 之後有一枱客坐喺角落, 餐廳真係會掉爛隻膠碟...sorry, 應該係掉膠...)
講番隻豬, 雖然只有4-5個星期大, 但已經好好肉地, 份量足夠4-5個人share 黎食. 肉係非常之淋, 但肉味則欠奉, 而且調味簡單 (應該只係用咗rosemary 放埋落隻豬到一齊烤焗) 所以食果時要點埋伴隨既肉汁, 加埋半脆既外皮, 咁就好味好多了 !
如果2丁友黎食, 應該係食唔到半隻的, 餐廳有提供tapas portion.
Side Dish: Pineapple 菠蘿 (回水啊!)
HK$70
第一個伴菜 – 烤菠蘿, 經理極力推薦... 但個菠蘿係用香料 (準確黎講, 係用肉桂同八角去醃), 所以...真係好難食啊 !!! 我地香港人真係唔係好食得慣... 大家試左幾啖就放棄左~
Side Dish: Potato 煙著蓉
HK$60
第二個伴菜, 煙過既薯蓉, 在下未有機會試食就俾同行友人掃光...在下心想應該唔差吧...
Main Course: Spanish Paella 2-4Pax 西班牙炒飯 (推薦!)
HK$600
食完豬就到最後一個主菜 : 西班牙炒飯~
一開始都諗緊究竟叫西班牙炒飯好, 定叫佢個朋友龍蝦炒飯好, 所以唯有又問下經理意見~ 經理解釋話龍蝦炒飯會比較dry, 一聽到呢度, 四人一致就已經決定叫西班牙炒飯… 因為下大家既生活已經好dry了, 唔想dry 上加dry~ 哈哈~
炒飯一上枱就鮮香撲鼻, 而且賣相吸睛, 令到飽左一半既我地忽然又有番胃口. Server 姐姐好好人幫我地分埋四份, 首先佢夾晒啲蜆同魷魚出黎, 然後用叉夾斷果3個蝦頭, 再咇晒佢啲蝦膏出黎, 撈埋落飯度, 嘩 ! 真係不禁嘩咗一下, 因為堅係好香 !
飯粒軟硬適中, 索左煮海鮮時既湯汁, 同埋蝦膏, 超濃上加濃, 超級好味! 重點係隻蝦, 爽, 鮮, 嫰, 香 ! 不愧為西班牙紅蝦, 不愧為世界上最好味既蝦! 至於蜆肉都唔錯, 不過魷魚圈就爭少少, 有點兒過韌.
整體黎講係一碟十分高水平既菜式.
<題外話> 佢寫就寫住2-4個人分享....但事實上2個人係冇可能食得晒...除非黎呢度淨係食個飯, 因為個portion真係唔算細.
Dessert: Crepe Suzette with Spanish Rum 千層crepe加冧酒
HK$95
第一道甜品, 友人一聽到侍者介紹話廚師會出黎親自整既, 即刻話要叫番一客. 其實係佢一個用crepe造既甜品 (lady M 啲朋友), 然後放上去煎pan, 加冧酒, 點火,然後大廚就喺度玩火, 勉強都算係視覺上既享受.
甜品本身應該係凍既, 所以煎一煎佢令佢變番暖暖地會更好食. 點火令冧酒既酒精揮發但留番佢既香味, 而佢既苦味會俾最後加上去既糖漿balance 番. 整體味道很不錯, 若然要挑骨頭既話, 就係嫌佢最中間部份仲有啲凍, 未完全熟晒.
伴碟既自家製既雪糕則令呢道甜品更上一層樓.
Dessert: Cinnamon Xurros 肉桂條
HK$95
鬼佬油炸鬼加沙糖再加忌廉再加朱古力醬... 4樣都係極度heavy既野, 呢個甜品簡直集萬惡於一身~ 所以我地都係淺嚐便算了.
Dessert: Strawberry Moose Cake 士多啤梨慕絲蛋糕
最後一個甜係送既, 在下無意之間喺叫野食果陣透露左俾經理聽今日係同行友人既生日, 佢就特登送左呢個甜品俾我地~ 味道呢, 好坦白, 一般過一般, 不過心意搭夠~ 些些~
BEVERAGE
Catalunya Sangria - Lemonade, Red Wine, Orange Liquer, Brandy, Fresh Orange Juice, Yzaguirre Rojo
HK$480 / Jar
同行友人並唔係愛酒之人, 但出黎食飯冇理由唔飲野, 所以簡簡單單叫一渣 Sangria (唔知sangrai係咩黎既朋友, 可以當佢係有少少酒精既fruit punch), 每人大概都分到2杯到. 正常味道.
(Sangria 係西班牙好common既野飲, 主要係紅酒底, 加少少切粒既生果, 加糖漿, 同埋少少brandy, 由於糖分比較高, 所以酒精會好快上腦~ 唔飲得朋友唔好空肚飲啦~)
Sparkling Water: Malavella
HK$70
OVERALL COMMENT
Food and Beverage
食物總括黎講算中上水平, 值得一讚既係個Avacado and lobster roll 同埋個paella西班牙炒飯. 其他菜式不過不失. 再黎既話, 未必再叫乳豬, 因為冇想像中咁好食, 反而應該試多啲Tapas (西班牙小食).
Environment
裝修靚, 又有梳化位, 最緊要張枱夠大(我地坐果張4人枱其實可以坐到6丁友) 所以坐得舒服又鬆動, good!而且枱同枱之間既有番一定既距離, 講野大聲啲都唔怕! 由於食飯果日係星期三, 餐廳唔算多人 (大約七成滿), 而且比較多鬼佬, 所以成間餐廳唔太嘈...唔知咩原因, 用英文大聲傾計唔會覺得嘈, 係心理作用嗎 ?? (所以成個場最嘈係我地果張廣東話枱, 失禮晒)
在下試過禮拜五晚黎, 由於佢地有個bar area, 加上餐廳full house, 所以都幾嘈下, 所以大家避免週末黎吧..
Service
絕大部份侍者都係講英文, 見佢地都好有heart去做, 笑容滿臉. 不過可能係星期三平日, 人手方面略有少少少少不足, 有時想叫service都未必即刻有人應到, 呢度需要注意一下.
需要再改善既就係成個場就只有經廳經理比較approachable 同埋健談, 但一個得人一把口, 又照顧到幾個枱客呢~ ? 可以既話, 應該請多個Assistant Restaruant Manager, 主動同客人傾多兩句, 咁食客回巢既機會就大增, 因為食客會覺得自己受到尊重~
Worthiness
4 個人埋單3千4百蚊, 平均每人800幾, 抵就講唔上啦, 叫做合理囉.
坐得算舒服, 服務又幾好, 喺dining environment同service呢兩部份都值回票價, 不過喺食物方面反而爭少少, 半隻乳豬索價$895, 加埋一差唔多成千蚊, 但味道未俾到驚喜, 所以扣分位出現~
飲飽食醉, 打uber回府, 再次跟友人祝賀, happy birthday ! 期待我地四人小組既沖繩之旅~
StartFragment
RATING:
Food: 34.5/40
Environment: 27/30
Service: 26.5/30
Minus: Nil
Bonus: +3 (Manager's Hospitality)
Total: 91/100
Ranking: A
Come Back: May well be
EndFragment
