玉蕾 - 1 億大洋的裝修, 高級中菜佼佼者 (已結業)
RESTAURANT INFO: Cuisine: Chinese (Shanghai & Cantonese 上海菜&粵菜) Ranking: 1星米芝蓮餐廳 (2015) City: Hong Kong Tel: 3746 2788 Address: 九龍紅磡環海街11號海名軒5樓 Website: http://kodining.com/chi/yu-lei DINING INFO: Date: 3rd October Time: 1345-1515 Meal: Lunch Pax: 2 With: T. Cheung Price: HK$1,000
- Food: $786 - Beverage: $56 - Others: 10% service charge 呢間餐廳在下已來過不下十次, 午餐晚餐都食過, 包過場五次~ 哈哈~ 這是在下引以為豪的事情 (平時包場需要6萬大洋, 5次~者係足足慳左30萬大洋~I Win!), 餐廳經理每次都開玩笑跟在下講: 趙生, 今日特登唔接其他booking, 留晒成個場俾你, 等你可以靜靜地食餐飯~ 冇計, 呢度既地點真係超級無敵唔就腳, 位置大約係喺黃埔船隔離, 紅磡海逸酒店隔離既服務式住宅海名軒五樓. 黎親每次都打的, 食完先慢慢行番去紅磡站 (散步消化). 千萬不要睇小五樓呢一層, 足足用左一億大洋去裝修, 裏頭收埋左2間一星米芝蓮餐廳, 一個Bar Area, 同埋接近一萬枝酒... 甫出電梯, 笑容滿臉的知客已主動跟在下打招呼: 趙生你好, 裏面請~ 哈哈, 在下心裏好清楚, 還未報上名來就已經叫得出在下名字, 今日起碼都有一半機會包場~ 穿過酒吧區同一條裝修得美輪美奐既長走廊, 餐廳經理Roy已"恭候"多時. 冇錯! 又包場了~ 哈哈哈哈~又賺左6皮~ 奉上熱茶及餐牌後, 跟經理閒聊了一會, 對話中他也詳盡解釋了為何在下可以包到5次場 (客人真係少得過份), 但餐廳仍然屹立幾年不倒... (恕在下無法在此透露, 因為當中唔多唔少都涉及了一些營商秘密) 廚師係日本人, 日本人做既中國菜, 在下一直都有所保留, 直至遇到呢一間餐廳, 在下才刮目相看. 這裏的菜式都是上海菜或粵菜, 雖然是傳統中國煮法, 用的卻是日本材料. 好一個mix and match! 三號風球下, 隔著落地玻璃望外面吹到東搖西擺的樹, 海面捲起數不清的白頭浪, 對面海逸酒店咖啡廳裏面既客人在營營役役,遊走於自助餐美食及座位, 為五斗米奔波, 而在下跟友人卻在一間好"空曠"既高級中菜廳內, 細聽著中國風house music及雨點撞擊玻璃窗, 有點"隔岸觀火, 悠然自得"既感覺~I Like it~
唔覺意包了場.... FOOD AND COMMENTS: Menu: A La Carte 1st Dish: 醃蘿蔔及四喜烤麩
開胃菜是也, 醃蘿蔔爽口清甜, 四喜烤麩亦做得不錯. 2nd Dish: 葱油白雞 Price: $48
今次午餐最有驚喜的一道菜! 雞用上了本地新鮮走地雞, 雞味濃郁, 以為雞肉會鞋, 但出奇地滑身. 日本人就是細心的代名詞, 所有雞肉已經去骨. 至於放面的蔥油, 則用上了日本大蔥, 故食落没有蔥的草腥味, 卻保留了蔥的甜味. 於在下而言, 蔥才是這道菜的主角, 雞肉瞬間被友人消滅, 剩下半碟蔥油, 在下一滴都冇放過, 盡掃而光~ yummy~ 餐廳經理開玩笑說, 在這裏點一客蔥油白雞, 一碗白飯, 便是全宇宙最美味的白切雞飯, 應該可以跟君悅酒店的海南雞飯做朋友!
3rd Dish: 水晶鮮蝦餃 Price: $24 (兩粒)
用上新鮮海蝦, 故蝦味濃郁, 鮮甜爽口, 又是久違了的高質蝦餃. 友人大讚, 並說跟以往食過的完全没法比較. 不過, 在下還是略嫌蝦餃皮厚了一點, 實屬美中不足. 再一次強調, 全香港最好味道的蝦餃在灣仔福臨門... 經理很好人, 蝦餃一籠四粒, 在下告知兩人食四粒有點吃力, 加上我們想試試不同點心, 故特許在下逐粒計. 原本想點一客會令人食完之後難以忘懷的點心 - 和牛肉球....可惜今天没有在餐牌上榜...經理解釋呢款點心成本太高, 賣一客蝕一客...所以暫時收起左, 或許要過一陣子才會再出現. 4th Dish: 蟹肉蒸燒賣 Price: $34 (兩粒)
蟹肉味道並不是太"出", 反而裏面的蝦跟蝦餃的蝦同出一轍. 同樣鮮甜爽口. 豬肉新鮮, 没有豬騷味. 不錯不錯~ 5th Dish: 海參灌湯餃 Price: $100 (一盅)
經理說餃內有不同材料, 蝦, 豬肉, 魚翅碎, 魚肚, 冬菇, 整體味道不錯. 餃皮雖薄卻不易穿, 以灌湯餃來說, 屬高水平之作. 但在下同D大舊肉的菜式並不是十分好朋友, 之所以會叫呢道點心, 完全是因為想喝口湯. 這裏的湯水煲得不錯 (之前試過它們的Buddha jump over the wall, 雖賣四百大洋, 但鮑蔘翅肚給得大方, 而且味道出眾) 今次灌湯餃的雞湯也十分鮮甜, 裏頭有兩小舊海蔘, 聊勝於無.
6th Dish: 北海道藍青口蒜蓉蒸粉絲 Price: $180
點心未必是這裏的最強項, 故點兩三籠便算了. 問侍者今天有没有時令小菜推介, 經理二話不說介紹了這道青口, 蒜蓉粉絲蒸. 扇貝蒜蓉蒸粉絲就食得多...用青口倒是頭一次... 跟友人說起, 或許日本廚師並没有傳統中菜的思想框架, 覺得什麼食材只要配合得宜就可以煮埋一齊, 對他們來說, 扇貝, 粉絲, 及蒜蓉三者之間並没有必然的關連...其實情況跟我們香港人煮日本菜一樣, 誰說軍艦一定要配海膽, 配紅豆都得架! 哈哈哈哈!!! 多虧了名X /X將, 紅豆軍艦曾經成為本港飲食界的神話. 講番菜式本身, 青口品種源自法國藍青口, 帶到日本北海道養殖. 至於味道, 則是肥美鮮甜味濃, 蒸煮程度剛好, 没有過熟, 裏頭的海澡已被細心的日本大廚清除. 味道跟平時在自助餐吃到的是totally two different stories, 這8隻係在下暫時喺香港食過最出色的青口. 青口上有些少蒜蓉, 味道不像街外般濃味, 没有蓋過青口本身的味道, 反而更能引出青口的鮮甜. 至於底下的粉絲不用多說, 盡吸青口汁精華, 哪有不舉起拇指的理由! 在此再度感謝經理的推介! 8大隻青口, 只賣$180....抵到無話可說, 或許這道菜又是賣一碟蝕一碟吧...下場會像和牛肉球般淡出餐牌嗎?... 7th Dish: 黑醋咕嚕肉 Price: $190
這裏的名菜, 顛覆了傳統咕嚕肉, 或許有人會覺得不倫不類, 但在下認為是fusion successfully. 每次來到這裏在下都必定會點上一客, 而所有食過此菜式的座上客都無一不讚.. 豬, 以往出色好食的咕嚕肉會用上半肥廋豬肉, 是故一半瘦肉 (扎實肉感) 一半肥膏 (豬肉肥香). 而這裡用上日本黑豚, 肉質較鬆軟, 肥膏已均勻散布在肉裏, 是故食落一D都唔乾唔鞋, 肉汁(肥膏)充沛! 甜酸醬改為意大利黑醋, 黑醋經過調味, 酸度輕微減少, 以往甜酸醬的酸香味没有了, 取而代之是黑醋香. 肉塊剛剛炸起便端上枱, 新鮮滾熱辣, 或許大廚有做天婦羅的底子, 炸粉不多, 皮脆而薄, 最怕食到成口粉的感覺. 剛上碟的黑醋就像麥芽糖般杰身, 纏繞著味蕾及口腔, 香味久久不散. 伴碟的紅黃綠椒sss, 為每啖濃味的咕嚕肉作緩衝. 日本version咕嚕肉, 正! 8th Dish: 脆皮杏汁包 Price: $30 (兩隻)
以前見到"杏"呢個字都怕怕, 但人大了, 口味會改變, 以前母親大人說從哪裏買來了一碗出色的"杏霜", 在下立刻敬而遠之, 而家卻珍而重之, 因為好的杏霜已買少見少. 這個杏汁包就像添好運的脆皮叉燒包, 但外皮更薄更脆更香, 而包本身則十分軟熟. 裏面的杏汁如心太軟般, 杏味清香但不過濃, 啱晒在下呢D剛由恨轉愛的人, 而不愛杏味的友人(或許他還年輕, 哈哈)也說其味道是在可接受範圍內. 請注意, 小心燙口! 9th Dish: 楊枝甘露 Price: $40
這裏的signature dessert是芒果布甸, 很多食客黎到都指定要點上一客, 原因是其布甸及芒果汁均選用日本芒果, 整道甜品没有額外加一粒糖都已經甜到入心. 但能否食到此甜品是撞手神的, 如當日大廚買不到靚既日本芒, 這道甜品就沒法供應, 而在下都食過幾次檸檬. 但在下今日想試試新口味, 故跟友人都點了楊枝甘露. 味道正常中上, 亮點同樣係佢所用既芒果, 雖不似日本芒, 但跟平時食開的也有明顯分別. 題外話, 冷知識, 有冇人知道楊枝甘露哪裏始創??? 答案係香港的利苑酒家~ BEVERAGE: 1. 普洱茶 Price: $28 茶錢 (每位) OVERALL COMMENT FOOD AND BEVERAGE 食物雖未能製造驚人效果, 但每一道菜皆屬高水平之作! 除用料矜貴外, 味道及賣相都係無可挑剔. 唯一可抽秤的是用餐餐具開始有一些殘舊的跡象, 筷子用上手也有點不順暢的感覺, 也許, 是時候翻新一下了. ENVIRONMENT 如要舉例一間餐廳專食環境, 這裏實是佼佼者. 無論餐廳裝修, 舒適度, 景觀, 潔淨, 都是滿分之作! SERVICE 今次連雞蛋裏也挑不出骨頭. 總共有3位侍者服務在下2位客人, 試問怎會有"遇溺"既情況發生, 一望過去侍者, 連手都未舉, 侍者已主動跑過來問有冇野可以效勞. 加上這裏的侍者個個專業, 介紹餐牌時如數家珍, 對每一道菜式都瞭如指掌, 上枱時也會告之餸菜是什麼, 不像其他餐廳般就咁放低碟餸然後走左去, 予人一種潛台詞:食啦你. 除了經理的好客, 值得一提係電話接booking的侍者及知客小姐, 兩者都充份表現了好客專業及滿分的笑容 (係啊, 其實聽電話都可以聽得出笑容...). WORTHINESS 淨係包場都已經值回票價... 加埋美食同完美的用餐環境及服務, 絕對是物超所值! 多謝友人賞臉呢餐飯, 三星期後再於此地見面, 食大閘蟹宴! RATING: Food: 36.75/40 Environment: 30/30 Service: 29.5/30 Minus: Nil Bonus: 3 (Manager's Hospitality), 3 (Greetings + phone manner) Total: 100/100 Ranking: A+ Come Back: Definitely Yes
