かつぜん Katsuzen @ 東京銀座 - 宇宙最強日本吉列豬
RESTAURANT INFO:
Cuisine: Japanese Tonkatsu 日式吉列豬扒
Ranking: 2016年東京米芝蓮1星餐廳
City: 東京
Tel: +81-03-3289 8988
Address: Koujun Building 4/F, 6-8-7, Ginza, Tokyo, 104-0061
Website: Nil
DINING INFO:
Date: 28th January, 2016 (Thursday)
Time: 8:30 pm - 10:00 pm
Meal: Dinner
Pax: 2
With: T. Cheung
Price: HK$1,834 (JPY27,841)
- Food: ~
- Beverage: ~
- Others: 10% service charge
東京美食之旅第一站~
友人鍾意食吉列野, 帶過佢去食在下曾經認為全香港最好味既Tonkinchi (丼吉), 佢果時食完之後果個開心滿足樣, 在下未曾忘記, 故特意安排旅程第一晚去食呢間全球首屈一指既吉列餐廳.
點解首屈一指? 哈~ 因為成本東京米芝蓮就得佢一間吉列野~ 是冇對手的~
當日飛機已經delay, 所謂禍不單行, 連機場快線都因為有人入左路軌, 遲多半個鍾先到酒店, 一放低行李便旋即啟程出發. 深知日本高級餐廳最憎人遲到, 哪怕是一分鍾, 都會俾晒臉色你睇, 有D仲會直情串到唔俾你入. 所以去到酒店之後即刻叫禮賓部改遲booking, 好彩餐廳話OK, 不過就冇得再叫Omakase (師傅發辦套餐), 得番散叫. 果刻心情真係低落左... 要知道Omakase係日本料理既靈魂, 廚師將佢認為最好既野呈上, 今次唯有無可奈何含淚接受....sigh...
誰不知塞翁失馬, 本身Omakase套餐包埋D沙律啊, 魚生啊, 湯啊, 甜品啊, 其實呢D全部都唔係呢間吉列餐廳既強項, 而家在下反而可以轉移彈藥, 將佢地餐牌大部分既吉列菜式都一次過叫齊~ 逐樣試~ (即管當是吃不到的葡萄吧)
餐廳喺銀座一幢商廈既4樓, 果層有好多餐廳, 而呢間野既門面真係弱得好交關, 喺果層兜左幾個圈都搵唔到, 最後唯有路在口邊...
餐廳唔大, 入口既左面就係一間榻榻米既包廂, 當日聽得出裏面係一班飲醉左酒既東洋人, 而除左呢間包廂之外, 就係main dining room既一張大吧枱, 而當時就只有在下同友人及另外2個食客, 是故又係一餐寧靜既Dinner~ 賣飛佛~
FOOD AND COMMENTS:
Menu: A La Carte
送既前菜: 火腿+蕃茄 (推薦!!!)
落完order去廁所洗個臉, 番到黎呢碗沙律已經放左喺枱. 望落賣相唔錯, 但再望望下就覺得塊火腿既顏色咁特別既~ 之後我地發覺其實佢係一塊切到好薄既豬扒 (吉列豬扒果塊既薄切), 肉香肥美, 正!!!
在下同友人大喜, 開心除左係因為塊豬扒好好食, 仲因為連送既前菜都做得咁出色, 無限期待黎緊既菜式.
伴碟蕃茄有唔同品種唔種顏色, 一D徧甜, 一D徧酸, 用黎中和番塊薄切豬扒既肥膩咸香.
題外話, 當講起用唔同蕃茄做餸, 在下同友人即刻諗起既, 都係1881裏面既法國餐廳St. George既一道前菜 (用多種蕃茄及多種煮法烹調)
吉列蠔 (推薦!!!)
price: around 3500 yen per 2
說實在, 好既吉列, 兩樣野, 粉薄, 料靚~ 係咁多.
一隻新鮮肥美既蠔, 沾上一層薄薄既脆皮, 出面脆, 裏面蠔汁充沛, 鎖住既蠔鮮係咬落去果下完全釋放出黎, 加埋少少檸檬汁同他他sauce, 簡值係人間味美!
價錢3,500 yen 2隻, 者係百幾蚊港紙一隻, 諗落又好似貴左DD... 若然大家有預算又係蠔迷, 著實不妨一試~
吉列大蝦配露荀 (部份推薦!!!)
price: around 3000 yen
餐牌上見到吉列大蝦, 友人認為不容錯過, 所以點左一客. 不過, to be honest, 在下對大蝦並冇太大既好感, 因為愈大既蝦, 蝦肉愈鞋口, 似乎今次亦唔例外, 蝦本身新鮮同炸得好, 但喺質地上係冇驚喜的... 至於最重點既蝦頭留左俾友人品嚐, 在下無法置評.
反而另人眼前一亮既係吉列露荀, 新鮮不在話下, 廚師仲用左塊好薄既火腿 (沙律前菜食果塊, 不過再薄D), 圍住條露荀拎去炸, 用油香包住清新, 今次真係"植樹舞子"!!!
如果下次再黎, 蝦就免了, 單點一個吉列露荀就more than enough!
蟹肉春卷 (推薦!!!) price: around 3000 yen
除左豬扒豬柳, 大人氣既仲有呢度蟹肉春卷 (下圖為一半份量). 裏面既蟹肉絕無欺場, 塞到爆晒~ 單單手工拆蟹肉都值回票價, 長腳蟹肉新鮮唔駛多提, 春卷皮亦做得出色, 絕對係一道不容錯過既推介菜式.
其中一個亮點係切口齊葺葺, 好靚呢~ 唔知係用咩刀, 加上咩功力先有咁完美既切口, 有些少強逼症既在下望左呢道菜都成半分鍾先捨得放落口, 好治癒啊!!
吉列豬扒 (推薦!!!) price: 6000 yen
食左咁多炸野終於到主角! 吉列豬扒, 下單時侍者已告之豬扒係"more fat", 放落口果然對辦~ 除左喺肉既邊位有一條小肥, 其餘既肥膏都均勻散佈喺成塊肉度, 一口咬落去幾乎咇到油, 依次棒!!! 離入口即化不遠矣, 高章之處在於那丁點似有還無既嫰滑口感.
炸皮夠薄夠脆, 無搶到戲份得黎又賦予左豬扒多一層截然不同既口感, 真真正正做到錦上添花.
一致跟友人認為呢塊係有生以來食過最好味既吉豬!
題外話, 喺香港好多既吉列豬, 肥瘦分明, 一塊瘦肉隔離有一條好大既肥膏, 肉還肉, 肥還肥, 同呢度係兩碼子既事.
吉列豬柳 (推薦!!!) price: 6000 yen
到另一個主角出場: 吉列豬柳. 侍者話比較less fat 同soft. 一咬之下, 的確無左上一道豬扒既肥油, 取而代之既係十分Tender既口感, 適合怕肥既朋友仔. 同豬扒一樣, 好香豬味 ,完全搵唔到平時Cheap豬果陣豬騷豬臭味!
一啖豬扒, 一啖豬柳; 一口肥, 一口瘦; 一下融化, 一下爽嫰; 齒脥流住肉汁, 夾雜誘人肉香~ 或者, 呢種就係"幸福既感覺"~
唯一可以改善既係D沙律菜...枱上唔見任何汁醬 (冇晒平時食果D咩咩柚子汁, 咩咩紫菜汁), 所以在下同友人都係食左幾啖就放棄, 因為實在太寡既關係.
炒飯 price: 1500 yen
驚唔夠飽, 叫左個炒飯. 米係珍珠米, 由於落左大量銀魚仔, 芝麻, 日本蔥落去炒, 所以十分惹味, 飯做到粒粒分明, 但唔知係唔係落得太多飯素(調味料), 濃味過頭, Dislike! 而且索價成舊水港紙一碟, 下次再黎, 都係叫番白飯好了...
BEVERAGE:
1. 烏龍茶 x 3
喺日本食飯, 如果唔想叫酒, 可以叫杯凍既烏龍茶, 價錢同枝啤酒差唔多 (大概700yen 一杯)
2. Asahi Beer
友人唔飲酒, 在下飲~ 叫左枝會有Angel Ring既Asahi~ 食炸野係要叫番枝啤酒先似樣的~ 爽啊~
OVERALL COMMENT
FOOD AND BEVERAGE
絕大部分菜式都屬高水平, 好味既桯度未必可以令你嘩一聲出黎, 但足夠讓你重申定義咩叫吉列豬扒.
ENVIRONMENT
雖然唔係D咩豪華食府, 人家小本經營, 但吧枱算坐得舒服闊絡, 加上食到半路又不經意地包左場, 唔錯唔錯.
SERVICE
夠Warm, 俾到一種家既感覺...well, 因為間餐廳既員工就係廚師冚家, 老豆同個仔喺廚房成吉思汗打仔 (大汗揼細汗), 個女就負責接客 (i mean 招呼接侍D客人), 老母就收數, 真係100%既家庭式經營~
雖然佢地既英文同在下及友人既日文都係海軍鬥水兵, 但在下也說過無數次, 笑容就係侍者對客人最親切既服務, 亦同時係食客對廚師既最佳認同~
WORTHINESS
一千八百大洋食吉列野, 未食之前會覺得好貴, 食完之後, 都係覺得好貴... 不過係值既~ 宇宙最強呢個名號冇俾錯, 的的確確係在下平生以來食過最好味既吉列豬!
友人大呻, 從今以後喺香港又少左樣野可以食, 上一個日本之旅已經立誓戒食香港壽司, 而家連吉列豬都唔食得...好快喺香港再冇日本餐廳值得入去了~
至於在下, 今餐以後, 其實也没有什麼大抱負, 只願在將來的餐桌上, 能多看一次閣下當日既笑容.
RATING:
Food: 36/40
Environment: 25.75/30
Service: 29.5/30
Minus: Nil
Bonus: Nil
Total: 91.25/100
Ranking: A
Come Back: Yes
