Ruth's Chris Steak House - 可能係全香港最好既扒房
RESTAURANT INFO:
Cuisine: Steakhouse
Ranking: ~
City: Hong Kong
Tel: 2366 6000
Address: 108 - 110, Level 1, Tsim Sha Tsui Centre, 66 Mody Road, Tsim Sha Tsui, Kowloon
DINING INFO:
Date: 12th March, 2016 (Saturday)
Time: 1:30 pm - 4:00 pm
Meal: Lunch
Pax: 2
With: A. Law
Price: HK$24xx
- Food: $15xx
- Beverage: $8xx
- Others: 10% service charge
好朋友請食生日飯, 一開始扮神秘唔肯透露食啲咩, 只講低1點半尖東站等, 並特意提醒Smart Casual. 在下粗略估計應該係酒店餐廳, 而最大路既估算係帝苑酒店 (裏面既中菜, 日本菜, 意大利菜同越南菜都係城中著名食府).
Meet up友人之後, 並唔係行去往帝苑酒店既地鐵站出口, 而係朝九龍香格里拉方向, 心諗: 唉吔~ 做咩咁破費啊~ 在下點好意思啊~ 呵呵呵~ 心裏暗喜著.
點之經過大門而不入, 繼續向海景嘉福/日航方向行, 心裏盤算著... 都OK啦.... 假假地都係酒店餐廳.... 點知行到去舊到冇得再舊既尖沙咀中心就停左落黎, 友人指住樓上Ruth's Chris話到左.... 而我呆左...
老實說... 在下當時心裏即刻打左個突... 心裏不禁 "刁" 左一下... 唔"能"是吧... 竟然係Outback啲friend... 我唔係話outback 唔好, 只係一開始期望都幾高, 本以為係酒店餐廳... 而家黎呢D cheap cheap "扒房", 仲話要smart casual, 耍我吧...
心情瞬間低落左, 不過算啦~ 好又一餐, 唔好又一餐, 當有人請食中午飯, 慳番一餐, 食完拿拿淋番公司做野.
(利申, 在下本身認為喺香港稱得上扒房既就只有洲際扒房同喜來登既Morton's ..... 其他既...極其量叫"餐廳"... Ruth's Chris, 之前的確聽過下, 但一直冇咩好感... 個名咁老土, 覺得好old school同好舊)
但當在下步入餐廳之後, 就知道 I am totally wrong!
首當其衝映入眼簾既巨型酒櫃, 好明確話俾在下知呢度唔係outback果個層次, 經過迂迴曲折既玄關時, 沿途木地板"立立令" (者係只要著住高踭鞋或皮鞋喺度行就會發出勁大咯咯聲果隻). 簡約加上新淨到可以反光既木裝修不停衝擊在下對Ruth's Chris固有既徧見.
當日禮拜六中午一時半入席, 幾乎包場, 除左我地就只有一枱著晒成套老西既鬼佬... 即刻覺得自己underdress左....
被安排疏化位既window seating, 連疏化都好新淨, 亦坐得舒服, 絕對唔係果D坐左十幾年勁淋果款 (一坐落去會矮左半個頭), 心諗呢間已屹立好多年既扒房係咪裝修過, 侍者解釋說, 原來一年前搬過鋪, 由地鋪搬左上黎一樓, 所以餐廳算係全新既.
餐廳無限寬敞, 枱同枱之間既距離喺香港扒房黎講算隔得最開既一間. 回想起洲際扒房果種同其他食客既超親蜜程度以及喺Morton's接近飛機升降般嘈吵既環境, 在下敢講喺環境呢一個環節, Ruth's Chris已大幅拋離. 呢種寧靜及從容"不逼", 估唔到可以喺扒房出現, what a big surprise!
坐低後, 侍者介紹自己, 同客人閒談一兩句, 鋪餐巾, 問飲唔飲野, 然後介紹餐牌, 酒牌, 樣樣做齊無甩漏, 又有笑容, Goodest! (當然, 成場得兩枱客, 好難做錯既~)
<叫菜篇>
午餐既set menu 是癈的 (得D沙律餐, 魚餐....同埋一千零一個牛扒餐), 所以轉戰A La Carte, 在下本來打算每人一塊大約10安士既扒, 叫唔同部位, 例如一個Rib Eye, 一個Terderloin, share黎食. 不過...友人一見到果塊大約30幾安士既Porterhouse steak, 已經排除異見, 問完你一大輪意見後, 最後一句擊沉你: 我都係覺得Porterhouse 好D, 你點睇?
既然係一條已有答案既問題, 加上在下從未試過 Porterhouse, 當然Say Yes啦! (既然主人翁都唔擔心荷包出血....在下就唔客氣啦~)
塊扒係冇跟任何配菜, 所以特意叫多一個前菜: Crab Cake 同一個配菜: French Flies (both for sharing).
<叫酒篇>
有佳餚當然要有美酒, 酒牌豐富, 故豐儉由人. 呢D咁Heavy既牛扒, 當然要配番D強勢既紅酒, Cabinet Sauvignon 就最好不過. 目標價位大約500蚊, 有法國同智利兩枝簡~ 最後簡左智利, 在下始終認為, 同樣五舊水, 法國果枝, 大部分價錢去左"法國"呢兩個字度... 智利既好似性價比高D~ 純粹個人意見.
FOOD AND COMMENTS:
Menu: A La Carte
Bread 面包
叫完野食即刻上面包, 普通野, 雖冇morton's 人頭咁大既洋蔥包咁驚喜, 但勝在剛焗起夠熱, 唔錯!
Crabcake 蟹餅 (Recommended! 推介!)
Price: $2xx
一個蟹餅Share食, 相中既係一人份量... 無錯, 一半份量已經有拳頭咁大... 呢度所有野都係American Size... 大家黎食飯叫菜時請注意呢一點!
在下係愛蟹之人, 無蟹不歡, 故無限歡喜呢道菜~ 蟹肉無欺場, 成舊都係一疏疏既蟹肉, 並無任何花巧, 佢就係一件踏踏實實既蟹餅, 配上Pepper Sauce, 簡單! 直接! 好味!
Porterhouse Steak 上等腰肉牛扒 (Recommended! 推介!)
Price: $12xx
食完蟹餅, 吹左大約15分鍾水, 就上主菜: Porterhouse Steak. 其實Porterhouse就係巨型既T骨, 一邊係Tenderloin 里脊肉, 一邊係New York Strip 牛前腰脊肉.
上枱後, 侍者隨即起刀將佢支解, 很窩心既服務... 否則望住咁大塊肉, 在下真係唔知從何入手...
我地點既係Medium Rare, 切開後, 勢色對貨. 加埋碟既熱力, 塊扒turn out 係在下最最最喜愛既Medium Rare 徧 Medium~ 真係龍顏大悅, 加埋勁香既牛油味道隨著碟既熱力不停揮發, 真係望(聞)到流晒口水!
骨既上面係Tenderloin, 侍者介紹先食. Tenderloin...故名思議...十分tender...講完...
由於油脂較少, 故肉味比較薄身, 肉質卻十分纖嫰, 基本上唔駛點咬, 適合怕肥/ 無牙既朋友仔.
下面既係Strip, 佢介乎Tenderloin 同肉眼之間, 犧牲一部分嫰口, 換來多一分油脂, 與其話佢兩頭唔到岸 (無Tenderloin 咁Tender, 無Ribeye咁Juicy), 不如做人正面D, 我地欣賞佢取兩家之長. 一塊上等Prime 級既牛扒, 本身已有一定既脂肪同幼嫰度, 故New York Strip 係一個 well balanced 既部位. 肉味香濃, 肉質細緻, 咬口多汁, 又係一塊久違了既上等靚牛扒!
切開晒後總數七件, 唔好睇每人食得幾件就以為一定唔夠飽, 實情係加埋頭先既蟹餅同埋薯條 (正常味道及質素), 仲有枝靚紅酒, 食完呢塊扒都已飽左九成, 大飽口福, 心亦滿足!
順道一讚侍者既刀工, 刀刀貼骨, 基本上無咩肉浪費.
題外話, 呢間餐廳既其中一個賣點就係sizzling!! 者係"滋滋滋"聲, 意思係上枱既食物都係熱辣辣, 功勞黎自佢隻燒到幾百度既碟, 菜式黎到客人面前, D油同汁醬仲喺度滾緊, 可想然知隻碟有幾熱. 在下抱著好奇心特登試下摸下有幾熱, 瞬間生水泡... 講笑者... 咪Kai, 邊個低能會試呢D野....哈~
食完成塊扒, 隻碟既餘溫媲美一隻暖蛋, 所以大家去食既時候要堅小心唔好掂到隻碟!!!
餐廳細心到連Sharing Plate都燒熱過, 確保所有美食唔會凍冰冰入口, 值得再一讚.
Dessert 甜品
基本上已好飽, 估計佢地既甜品如無意外地都係美國size, 故諗住直落咖啡茶就收工. 就正正喺呢個moment, 侍者奉上甜品: 插左candle味道平平無奇既cheese cake, 單調既紅桑子加吉士, 同埋寫得好核突既Happy Birthday~ 不過, 在下真係無諗過好朋友會咁細心安排呢個遲來既birthday cake, 真心有一刻俾呢個甜品move左一下, 帶著受寵若驚既心情去食呢個甜品, 每一啖都溫暖入心, 而舌尖嚐到既, 就係快樂既味道!
BEVERAGE:
1. San Pellegino Sparking Water x 1
Price: $7x per bottle
2. Red Wine
2011 Casa Lapostolle Cuvee Alexandre, Carbenet Sauvignon, Apalta, Chile
Price: $5xx
又係難得既佳釀, 詞窮, 冇咩形容詞, 可以講既就係呢隻提子應該要表現既野都喺晒度, 在下很喜歡呢枝酒. 醉翁之意不在酒, 在乎溝通與關懷, 酒杯在手, 醉帶三分, 知己在前, 談得興起, 對在下黎講所有酒都係佳釀~
OVERALL COMMENT
FOOD AND BEVERAGE
一塊好味既牛扒, 最緊要就係塊扒本身既質素, 呢度實在做得出色. 硬要比下去既話, 洲際扒房嬴Ruth's Chris既係十把扒刀, 八隻海鹽, 十二隻芥末俾你簡. 不過, gimmick 呢D野, 玩一次就夠, 佢既因枱與同枱之間太近而產生既逼壓力, 加上堅離地既價格, 已經多次令在下郤步.
ENVIRONMENT
餐廳新裝修, 硬件上已經冇得輸, 加埋接近包場, 輕鬆做出愜意恬靜既Dining Environment. (呢樣野喺香港餐廳係極難搵到的, 除左玉蕾~ 哈哈)
SERVICE
食完蟹餅後連鬼佬果枱都走埋, 侍應one hit one, 服務點會唔好? 適逄在下生日, 主動幫我地影相, 仲送左一幅即時曬出黎既相做留念 (唯一缺憾係幅相好Q矇啊~ 頂你! 點渣機架!!!)
WORTHINESS
友人請客, 所以價錢不太清楚, 依稀記得埋單二千四百幾. 一塊30安士超高質既porterhouse, 一件好有份量原汁原味既蟹餅, 一枝靚紅酒, 加埋咁好既環境同服務, 拍心口講句: 簡直係超值之作!!
題目點解會話"可能"係全香港最好既扒房? 因為仲有一間扒房Beef Bar, 又係在下最近發掘到既新星. 服務同樣細心, 環境冇Ruth's Chris咁舒適, 但佢既扒同意粉, 稱得上天下無雙之作! Beef Bar Dining Review將於日內推出~ 多謝支持!
至於在下以往力推既洲際扒房同Morton's, 你就當今日的在下打倒昨日的在下, 奉勸一句: 未試過既朋友, 無謂嘥錢去試, 食過既朋友, 當回憶吧, 人, 要向前望!
笑聲之下同友人傾左兩個半鍾, 歡樂時光過得特別快, 轉眼已到四點, 本打算帶著半醉既身軀番公司做埋D手尾, 但似乎酒精會隨著歡笑聲極速入血, 所以最後直接打道回府~
最後, 鄭重再躹躬多謝友人 A. Law 俾左在下一個完美既 Birthday Dining Experience! 同時亦令在下對Ruth's Chris 徹底改觀, 呢間餐廳從當日起, 已變左在下既鋸扒飯堂~
最後最後, 恭喜友人剛取得喺事業上一個好大既里程碑, 實在值得興賀, 下一餐my treat!
RATING:
Food: 37/40
Environment: 28.5/30
Service: 29/30
Minus: Nil
Bonus: +3 (喜出望外既扒房)
Total: 97.5/100
Ranking: A+
Come Back: A Must
