Fujiya 1935 - 大阪最完美用餐體驗 及 驚為天人的鴨胸
Restaurant Info:
Cuisine: Innovative (新派)
Ranking: 3 Michelin Stars (2015)
City: Osaka
Tel: +81-06-6941-2483
Address: 2-4-14, Yariyamachi Chuo Ku, Osaka, Japan
Website: www.fujiya1935.com/
Dining Info:
Date: 4th February, 2015
Time: 7:00p.m. to 10:00p.m.
Meal: Dinner
Pax: 2
With: T. Cheung
Price: around JPY46,000.00yen (~HK$3,100)
- Food: JPY30,000yen
- Beverage: around JYP7000yen
- Service Charge: forgot
Food and Comments:
Menu: Tasting Menu
入到餐廳, 進入一個玄關位置, 侍者奉上一杯花茶同濕毛巾. 然後坐低望住佢一隻好大既碟 (應該係蓮葉擺設), 每隔十秒就有一粒水珠慢慢打圈滑落去, 望住佢, 心都定下來, 主要等你山長水遠走過黎之後沉澱一下, 定一定神, 唔駛趕頭趕命入餐廳坐低睇餐牌叫野食叫酒飲 . 坐左大概五分鍾, 就帶在下同友人上樓梯入Dining Room. 我地被安排坐在餐廳最側邊既位置.
餐廳唔係好大, 大約可容納20人, 除左我地果枱, 其他都係日本人. 而好明顯人地黎食飯, 真係非常注重禮節. 男既西裝, 女既晚裝, 跟在下同友人形成強烈對比(我們只有恤衫牛仔褲)
...咁佢網址寫smart casual 就ok 嘛...咁我地又係遊客嘛... 點都好...百詞莫辯...真係失禮晒.....
坐低之後, 派menu (冇錯, 係派, 因為全宇宙食同一個menu, 冇野好簡, 派個menu係俾你for reference, 知道自己食緊D咩)
Order 完sparkling water 同 wine pairing 之後, 就開始呢個全大阪最佳餐廳既美食旅程.
1st Dish: Radish, Wasabi Cream From Masuda City
第一道, 很簡單的一道菜...就係一粒蘿蔔..., 爽口, refreshing. 但在下始終食唔慣生既蔬果...好彩有wasabi cream伴一伴, 當堂唔同晒.
2nd Dish : Cheese Ball
巴馬臣芝士波, 好香芝士味, 細細粒又吉心, 所以雖然味濃但唔覺膩. 呢道菜, 如果平時用黎送紅酒, 真係一絕!
3rd Dish: Black Soy Bean Bread with Air Bubbles
超海綿的黑豆味面包...在下覺得還可以, 友人則覺得有D奇怪. 質地軟綿綿, 中間少少濕...umum... well...actually...not our cup of tea.
4th Dish: Mukago, Anchovy Sauce
實在唔太記得呢道菜係什麼... 總之就係收埋左D食得既野係樹葉下面, 要尋找一輪先搵到. 既然在下同友人都冇咩印象, 應該唔係D令人深刻的菜式.... 唯有係咁LA....
5th Dish: White Shrimp and Prawn Bizcocho
蝦刺身, 用鮑魚殼黎裝飾, 賣相一流. 蝦肉爽口, 非常鮮甜, 配埋底下果塊Bizcocho (西班牙既Pastry), 脆脆地. 整體感覺很不錯!
6th Dish: Japanese Taro Root from Tondabayashi
又係要玩捉迷藏. Taro, 者係芋頭, 呢個芋頭係我食過暫時最好味既芋頭, 出面炸到脆口, 裏頭好熱, 好香, 好滑. 友人話成件事有少少似炸薯角.
在下本身個人唔鍾意食芋頭, 但驚喜地佢令在下對芋頭刮目相看, 些些!
Bread
食到中段, 先上面包. 面包裝係一個木盒仔, 一打開, 不得之了!!! 勁香面包味!!! (不過, 剛剛焗起, 其實大部分面包都勁香架啦....哈哈)
牛油有兩款, 一款芝麻, 一款牛奶. 芝麻果款好特別, 但牛奶果隻有驚喜, 好少遇見咁香牛奶味既牛油. 最後...在下用一個包差D完成左成舊牛油...又不知道塞了多少條血管...
7th Dish: Tilefish, Tomato, Japanese Parsley, Shimonita Leek
Amadai - 紅甘鯛, 以前食開既都係煎/炸, 可以令到白滑魚身更加香口, 炸係因為魚鱗經油炸後都食得. 出面香脆可口, 入面魚香白滑, 利用兩種口感俘虜味蕾.
但今次, 大廚係用湯/汁煮(我估)既方法. 一開始以為冇煎既紅甘鯛會失色, 但原來咁既煮法係會令呢條魚滑上加滑, 同時亦令到魚既鮮味更加突出. 伴菜有番茄, 日本番茜, 蔥, 令到成道菜既味道更豐富, 但又唔會蓋過/搶左魚本身既味道....而最後果啖魚湯(汁), 哈, 食完又係感覺到世上無所羡慕...
今次訪日, 食了這間3星餐廳及2星既壽司餐廳Harasho, 兩者都有菜式用上amadai. 這裏明顯勝一籌.
8th Dish: Pufferfish Soft Roe, Truffle, Potato Consomme
白子的菜式, 白子, 者係河豚既魚精囊. 靚既河豚(尤其係虎河豚)只在冬天提供, 屬季節料理, 也屬高級料理. 所以大家會發覺一D高級既雞泡魚料理餐廳...只開半年... 在下永遠都有疑問, 做半年就已經夠交租人工架啦咩?
這裏的白子配上薯仔清湯, 同一片片既黑松露. 白子本身冇咩氣味 (或者有腥味....GUA....始終係果D野...好彩個鼻唔係太靈敏, 聞唔到...) 黑松露已香味逼人. 細心品嚐白子, 滑溜非常, 至於味道則十分特別, 筆墨難以形容, 但係食過既人, 都會喜歡呢款食材.
食過幾次白子菜式, 包括東京既2星河豚專門店Yamamoto , 3星日本料埋 Ishikawa, 這裏做得最出色!!! 俾個讚佢!!!
9th Dish: Brown Mushroom Spaghetti
磨菇意粉, 一道再簡單不過的磨菇意粉, 友人話係食過最好味既磨菇意粉.
意粉自家製, al dente, 彈牙, 做得出色. 巴馬臣芝士汁好香好滑, 唔係走杰身路線, 磨菇刨到極薄. 食落口, 芝士味最出, 然後係磨菇香, 最後滲出淡淡既面粉香. 呢道簡單既菜式, 在下也不用千言萬語去形容, 兩個字: 好食!
望住個menu, 而家食到中段, 竟然食一個意粉? 仲係芝士汁? 食完咪濟到死? 但呢個意粉份量其實調較得剛剛好, 正常食到3 口份量, 個口大DD可以一啖食左... 啱啱吊口唔吊肺...
不過, 美食的份量何為最好? 就係 啱啱好~唔夠 (just not enough). 呢度菜簡直係代表! 友人更大讚呢個意粉簡直係好味味到一試難忘.
10th Dish: Abalone from Hokkaido, Butterbur Sprout, Japanese Cabbage
鮑魚, 鮑魚味道不是太出. 老實說没有什麼特別. 值得一讚係佢既Kimo Sauce (用鮑魚內臟做既汁) 真係好香. 令平平無奇既鮑魚變得特別. 係日本, 食高級壽司鋪, 都有呢道菜, 而通常佢地既煮法都係類似咁, 鮑魚內臟汁配鮑魚, 每次食都係賞心樂事.
11th Dish (Main): Duck, Several Kinds of Onions and Leeks
於在下而言, 呢道菜係成餐飯既重點!!! 本身一開始見到menu寫住鴨胸, 本以為今次冇運了, 睇食評, 人地之前黎都係食和牛...點解在下咁黑仔...變左鴨胸...真係有一刻想講大話...well...i am actually allergic to poultry... 但一來冇咁既膽量, 二來訂位時人地已經問左你有冇咩唔食, 冇理由而家係度發爛, 所以我由到尾都冇期待過呢道主菜,
鴨胸, 平時食開都係煙鴨胸, 九成會配埋沙律, 自小便覺得呢款食材冇咩特別. 俾我既感覺就係咸咸地, 鞋口 (就算酒店食果D都係鞋口), 一陣煙味, 凍既, 一片片既. 所以平時食飯都唔會簡鴨胸做主菜.
但點之!!! 呢個, 一上枱, 勁香, 賣相十分吸引!!! 竟然唔係一片片(為D無聊事而驚訝...哈), 呢度係厚切, 血紅色, 望落土同和牛既吸引力不相伯仲, 未食都流晒口水. 週邊配上7款唔同既蔥, 有大蔥, 有洋蔥. 最後淋上鴨胸既肉汁 (Duck Breast Jus~).
一落刀, 出奇地非常易切得開, 放入口, 好嫩滑, 好香鴨香, 完全顛覆左對鴨胸既睇法, 在下同友人都對望, 不奇然地說: 原來鴨胸係應該咁樣. 一口肉, 一口蔥, 不要看少蔥, 全部都係新鮮清甜, 尤以右面的日本大蔥在下最為喜愛. 每款蔥既味道都會唔同, 甜度都唔同. 隔住一口鴨胸肉, 一口蔥, 因為唔同品種既蔥, 令成道菜既味道層次十分豐富. 無以上之, 夫復何求~(絕無誇張).
題外話, 另一樣在下覺得好難整得好食既係~鴿pigeon... 但食過新加坡Restaurant Andre, 才會明白咩係鴿...
12th Dish: Strawberry and Snow
冬天, 應一應景, 第一道甜品, 當然道要清一清味蕾. 清甜既Berries係冇得輸. 每一款berry (主要係Strawberry)都好甜, 當然, 唔會一味死甜, 甜得黎帶少少果酸成份. "雪"係由椰絲粉整成, 配埋蘋果味既雪糕同雪人.
個雪人可愛到唔捨得食...咁靚咁得意既甜品都係第一次見, 除了味覺, 視覺也滿足了, 賞心悅目~
13th Dish: Ice Cream of Tarte Tatin
Tarte Tatin 本身係一種甜品, 而家用左佢既味道整成一個雪糕. 好抱歉, 在下唔係太記得其味道, 應該不過不失.
14th Dish (Petit Four): Ice Cream of Passion Fruit and Dill
凍既小甜點, 刁草味同熱情果, 甜甜地, 幾好食. 第一眼以為係扮聖誕樹...但望落...似陀螺多D...是爆旋嗎?
15th Dish (Petit Four): Honey Cake
食左咁多凍既甜品, 埋尾最後一道, 外表炸過既蜜糖蛋糕, 再淋上糖醬, 為呢餐完美既晚飯畫上一個好深刻句號. 實際味道在下真係唔係太記得了, 依稀記得係好甜, 幾heavy. 但呢道微熱既甜品給予人一種好溫暖既感覺, 就好似同一個好朋友玩左成日, 臨尾say bye bye時既擁抱, 好窩心, 好Warm, 好Sweet.
Wine: Wine Paring (3 glasses)
JYP3500 per person
選擇左佢地個wine pairing, 大概3千幾yen, 抵到喊... 包三杯紅白酒. 但很可惜, 當時見到D食物太高興同興奮, 飲下飲下都唔記得左自己飲左咩... 但記憶中呢3杯酒都係好易入口.
Overall Comments:
Food and Drink:
食物味道賣相, 所用食材之廣泛, 烹調方法款式, 以至於分量, 跟前後道菜之間既配合, 成餐飯既起承轉合, 老實說, 基本上是十分接近完美, 好難搵到可以挑剔既地方.
另外, 餐廳所用既刀刀碟碟, 都十分有心思, 款款唔同, 所以食左十幾道菜都唔會厭, 而且所用之食材料好少重覆 (不似之前提及過既Les Amis), 每次上枱都仿如一件有驚喜既藝術品.
係關西都算食過十幾間米芝蓮餐廳, 暫時為止, 若論最佳食物質素及完美用餐體驗, 呢間當首, 其次有嵐山吉兆本店同大阪兩星天婦羅旬菜天.
Environment:
餐廳裝修簡潔, 最喜愛就係一樓果個玄關位, 等你調整好心情先入餐廳. 成間餐廳用左大量木既裝修, 俾人十分溫暖既感覺, 尤其在冬天. 室內同時設計簡約, 而果塊係樓梯既大玻璃, 則予人一點時尚既感覺. 成件事不失高貴, 但又唔會營造到平時法國餐廳既拘謹嚴肅, 令人好relaxed, feel comfortable.
Service:
日本餐廳既服務很少失準, 呢度亦都唔會例外, 全部侍者笑容更加可嘉, 讚既說話不多寫, 反正就是專業!
唯一既瑕疵, 就係始終溝通上仲有DDDD問題. 在下非常感激餐廳已安排一個會說英語既侍者給我們介紹, 但由於菜式涉及太多專有名詞, 致未能夠100分詳細介紹每一道菜, 大家既簡單對答係冇問題的, 只係深入少少既就...., 幸好在下同友人都學過少少日語, 不致於雞同鴨講. 相比起再一年前係東京食既Takazawa (果度由老闆親自以流利英語為每菜介紹及同客人溝通), 關西餐廳係呢方面的確有D失色.
不過, 語言障礙絕不會影響到這裏高質的服務, 因為他們有無限既耐性同笑容.
Worthiness:
呢餐飯隔左半年先寫番出黎, 好可惜, 已經搵唔番D單, 唔係好記得餐飯食左exactly幾多錢. 但計埋酒水應該係4萬幾yen. 很老實說, 咁既質素, 咁既服務, 咁既餐廳, 2個人連埋酒水都係港幣3千蚊到, 以fine dining 角度黎講, 真係抵到爛了! (當然, 日元匯價徧低係主要因素)
香港既 World Class Restaurant, 淨係tasting menu 都講緊接近$2,000 per person, wine paring 再加多千幾蚊 (唔信可以去睇下2星米芝蓮餐廳, 置地文華東方酒店既Amber 或者3星米芝蓮既廚魔佢地既天價menu), 每人差唔多成3千幾蚊落樓.... 貴左大阪呢間一倍....
所以話, 與其係香港食所謂既"Fine Dining", 倒不如儲多個錢飛去日本食, 食物質素更高, 價錢相對地低. 仲可以遊日tim~
有鑑於此, 在下黎緊一月尾決定再去東京一轉, 食野~
日本慣例, 食完餐飯, 日本大廚都會走出黎係餐廳問下你食成點同你握手, 互相多謝一番. 跟住一直等到你完全離開他的視線, 他們先會回去入番餐廳. 在下同友人當然把握機會影番幅合照, 將美好回憶定格.
整餐飯, 差不多食了三小時! 飲飽食醉, 帶著幾分酒意同滿足既感覺, 回大阪洲際酒店好好大睡一晚. 在此, 再向友人T Cheung 講聲多謝, 不是你, 没有這餐食, 没有你, 不會這般快樂!
Rating:
Food: 39/40
Environment: 29.75/30
Service: 28/30
Total: 96.75/100
Ranking: A+
Come Back? Yes
