Chesa 瑞樵閣 - 半島酒店之"窮人恩物"
RESTAURANT INFO: Cuisine: Swiss 瑞士菜 Ranking: 2015年米芝蓮推介餐廳 City: Hong Kong Tel: 2920 2888 Address: 九龍半島酒店1/F Website: http://hongkong.peninsula.com/en/fine-dining/chesa-swiss-restaurant DINING INFO: Date: 8th January, 2015 (Thursday) Time: 7:00 pm - 9:00 pm Meal: Dinner Pax: 2 With: E. Wong Price: HK$2,000 - Food: $1,430 - Beverage: $312 - Others: 10% service charge 題目為"窮人恩物", 不過, 在下先為"窮"下一個定義....如果閣下既預算係每人1,2百... Well... TBH..呢D唔係"窮", 係"好很窮"......恩物都打救你唔到...若閣下可以afford到每人6-7百蚊, 又想搵一間高級西餐廳同另一半浪漫地慶祝生日, 聖誕, 情人, 萬聖, 盂蘭, 清明, 之類之類, 又或者用黎求愛, 求婚, 求分, 等等等, 在下敢保證, 呢間餐廳肯定係The Best Choice! 容後在下會推介一個二人餐單俾大家參考, $1,400蚊有找 (價錢已計Service Charge, Tips, 飽到上心口, 再加100%滿足). 在下已推介過俾無數朋友, 個個都話正, 真心希望大家用得著~ 講番餐飯先, 餐廳喺半島酒店一樓, 入左酒店經過大堂(城中聞名食"High Tea"既Lobby Lounge所在地), 上兩層樓梯, 左手面有一道小門, 裏面就係Chesa. 餐廳裝修成一間外國木屋仔, 予人溫暖既感覺! 情侶黎食, 可以訂枱時同餐廳要求梳化位, 兩個依偎並排坐, 暖到入心~ 坐底後, 侍者便奉上menu, 餐牌冇中文, 全部一串串雞腸~ 不過在下黎之前已經心裏有數會叫咩食, 其實都係點番呢度出名既野, 者係在下所講既2人餐單. FOOD AND COMMENTS: Menu: A La Carte Bread Basket
落完單就上面包, 味道不過不失, 唯一問題係溫度, 些微溫暖都没有, 唔通呢D係瑞士傳統? 因為喺赫德道既瑞士餐廳 (Swiss Chalet) 遇到相同既情況... 都好, 反正要留肚俾濟到喊既芝士火鍋, 呢籃面包淺嚐過便算了~
1st Dish: Jerusalem Artichoke Custard with Seared Scallops and Bacon Chips Price: $210
煎帶子配煙肉片及雅枝竹吉士: 呢道菜係Seasonal Item, 季節限定是也. 帶子煎到半生熟, 外面微脆香口, 內裏溏心嫰滑, 係在下最喜歡既生熟程度. 伴上新鮮蔬菜及邪惡既煙肉脆脆, Yum Yum! 除左帶子, 底下既吉士都係亮點, 雖說用上了雅枝竹, 味道並唔係好出, 但其Creamy, 重奶味及滑不溜口既質地, 足已俘虜味蕾. 2nd Dish: Crabmeat Pancake with Lobster Bisque Cappuccino Price: $320
蟹肉班戟配龍蝦汁~ 呢度既名菜之一, 喺Openrice超強曝光率, 好似每枱必叫, 在下當然都唔例外. 一梳梳蟹肉被微暖班戟包住, 澆上香濃誘人既龍蝦汁, 上面仲有一小塊似有還無既黑松露, 一上枱便滲出淡淡松露香! 至於味道, 就係龍蝦同蟹既交融, 簡單味美! 3rd Dish: Fondue Montagnarde - Emmentaler, Appenzeller, and Gruyere finished with Sprinz and Smoked Mountain Beacon, served with Macaroni and Boiled Potatoes Price: $270
成餐飯既重點, 亦都係黎呢度既主要原因: 芝士火鍋. 相傳好耐以前有個瑞士人上雪山, 去到半路好凍好肚餓, 而身邊只有少量芝士, 面包同酒, 所以就拎左個煲, 煲溶左芝士, 加酒, 用面包點黎食, 發覺原來咁整又幾好食, 之後一個傳一個, 芝士火鍋就係咁黎.... well... 咩人會喺行山時帶埋個煲... anyway, 聽故唔好駁故~ 餐牌上有兩款芝士火鍋, 一款叫Fondue moitie-moitie, 係最原汁原味, 最正宗, 比較接近上面果位瑞士人所整的, 由兩種芝士溝成, 配菜亦只有baguette面包粒, 味道比較單調, 老實說, 食多兩啖就會覺得悶 (在下已試過了). 雖說係最傳統, 但始終味道行先, 故事呢D野聽完就算. 另一款係在下推介既Fondue Montagnarde (價錢只係貴多10蚊), 估計係改良版, 味道較為豐富, 由3款芝士組成, 裏面仲有煙肉粒 (芝士配煙肉, 點會唔好味?) 而配菜除左有面包粒, 仲有巨型通心粉同薯仔. 餐廳好細心, 食呢道菜時隻碟會轉做一隻芝士型既碟, 配埋枝超長叉, 巧得意AR!!! (聊勝於無而已...哈哈) 呢兜野係芝士愛好者既天堂, 討厭芝士者既惡夢. 芝士一上枱, 芝味濃郁, 火爐喺下面煲煲煲...... 酒精揮發時帶埋芝士香攻陷嗅覺, 香到連隔離枱都聞到~ 如果閣下唔鍾意芝士陣味, 你GG了... 因為成間餐廳都係呢陣味~ 美食不等人, 配菜一上就即刻叉舊面包落去, 軟軟既法包粒俾溶岩般既芝士包圍纏繞, 好香, 少少咸, 幾漏, 好肥, 但好滿足, 真係百般"芝"味在心頭! 而咁多樣配菜最好食就係薯仔 (在下試過就咁齋食都好食到爆). 沾左芝士既佢, 層薯仔衣夠薄夠"脆", 喺極膩既芝士同綿綿薯仔肉中間, 賦予多一重口感, 正! 呢度既芝士火鍋冇意粉屋或者Pizza Hut咁多配菜, 又三文魚, 又海鮮, 但呢度既芝士, 配埋木屋仔, 加埋半島感覺, well, they are two different layers~ (淨係價錢...都已經唔同層次...哈) 食呢個芝士火鍋有幾樣野要注意: 第一: 食果時大家千期唔好扮斯文, 蜻蜓點水咁去點, 而家唔係食壽司點豉油. 你咁做一黎令餐飯比較拘謹, 二黎令到最下面既芝士永遠郁唔到, 而佢...係會燶的. 正確食法係大家用果隻長叉, 一野叉到最底, 然後當面包好似係海綿咁, 抹一抹個鍋底~ 然後拎上黎食. 第二: 佢一路煲, 你一路點, 其實都好快食晒, 但食呢道菜, 緊記...千期唔好急, 唔好搏命食... 食唔晒係好正常, 如果你食晒既話, 好大機會已經濟到喊, 樂極生悲了~ 第三而最重要既係: 同女孩子黎食, 或者怕酒精太苦太濃既朋友, 記得Order時叫侍者落少D酒 (不過正常情況下侍者會主動問). 果陣酒苦味唔係個個都鍾意.. 相傳仲有一個故事, 如果你叉緊舊野不慎跌入芝士大海...咁果個人就要罰唱歌~ 純粹故事, 大家請不要在五星酒店放懷高歌~
4th Dish: Rack of Lamb with Roasted Garlic, Fine Beans, Carrots and Gratinated Potatoes Price: $430
呢度既烤羊架, 係在下食過咁多羊架當中排名第二, 無論味道, 香味, 肉質, 調味都係首屈一指, 每次黎親都可以保持水準. 今次同樣循例地叫了Medium Rare, 上枱時是Medium徧Rare, 剛剛好, 最佳生熟程度. 太生像茹毛飲血, 太熟就浪費了食材. 傳說好味的羊, 係有一種羊鮮, 而呢陣味道並唔係指羊羶, 大家不妨黎呢度體驗一下. 伴菜有烤蒜頭, 豆, BB蘿蔔乾, 伴菜仲有薯餅, 2個人share , 份量其實剛剛好. 題外話, 排第一既羊架係喺一間叫 The Drawing Room既一星意大利菜... Well, 餐廳雖已不再在人間, 但佢既羊架同西班牙紅蝦意粉係在下心中永遠的第一! 5th Dish: Chalet Suisse - Swiss Chocolate chalet with Vanilla Ice-cream and Hot Chocolate Sauce Price: $180
窩心既甜品出場 - 朱古力小屋. 訂枱時可以要求喺屋頂上寫字: Happy Birthday/ I Love You/ Would You Marry Me? 小屋由6片朱古力搭建, 裏頭係雲尼拿雪糕同忌廉, 煙囪則用上肉桂餅, 跟埋既仲有一兜朱古力醬. 餵飽相機之後, 就可以暴力拆屋. 世界係好公平既, 俾雙眼咁多驚喜, 味道上當然係... 不過不失啦~ 雪糕夠滑夠香, 配埋朱古力醬同朱古力牆 , 認真, 唔差 (當然, 驚喜欠奉~), 加上朱古力係半島名物, 爛船都有三根釘. Petit Four
西式既美點隻輝, 有肉桂軟餅 (請注意, 大部分友人都對呢件野耍手擰頭, 在下則覺得幾好食), 另配上名物朱古力兩小粒, 如果用黎襯咖啡, 一流享受~ BEVERAGE: 1. San Pellegino Sparking Water x 2 Price: $68 per bottle 雖然餐廳免費供應Table Water, 但在下徧愛有氣礦泉水, 貪其泡泡可以喺菜式之間清潔味蕾, 同埋減輕油膩感. 2. Hot Chocolate Price: $88
今次在下罕有地冇叫咖啡, 試了Signature既朱古力. 用high ball 杯呈上, 配以金屬製杯座, 未飲都感受到其貴氣. 可可香味怡人, 不過在下略嫌太重奶味, 整體感覺比較稀身, 飲落唔太似心目中既朱古力 (Ritz Carlton Hotel- Cafe 103 既熱朱古力就係在下既Ms Right, 又杰又濃). 隨朱古力還配上一小兜可可粒同忌廉, 嫌唔夠heavy既可以再微調一下. 不過...或許老了, 甜既東西已不是在下朋友, 下次黎都係叫番咖啡, 朱古力呢D小玩意, 都係留番俾細路. OVERALL COMMENT FOOD AND BEVERAGE 黎過呢度不下十次, 裝修, 人事, 都係十年如一日, 食物當然唔例外, 穩打穩陣. 或許係喺味道上未必俾到驚喜, 但每次用餐體驗都有質素保證~ 在下強烈推介~ ENVIRONMENT 唔好以為喺半島酒店, 餐廳就靜到無輪, 切大力D都怕整到有聲好尷尬. 餐廳其實一D都唔拘謹 (當然, 基本用餐禮儀都要注意), 木屋仔, 其實就係想營造出一個好warm既氣氛, 大家放心談話好了. 落完單後, 侍者會係枱面放好晒刀叉, 記得, 由食到外, 食完將刀叉放番喺隻碟度, 唔好放番喺枱.
SERVICE 半島酒店, 賣既就係五星服務. 每位侍者係好專業同有禮貌, 而特別點名讚一讚既係餐廳經理, 十分風趣幽默, 同佢既對話, 令成餐飯輕鬆好多! 唯一要改善既電話接booking既侍者, 或許佢地真係每日接幾百個call, 又或者已經係忙到七彩, 但種種都唔可以係理由. 電話中未感受到半島應有既禮貌, 而且, 等客人收左線自己先收線...基本野吧... 不過, book位已經喺一個月前既事, 對餐廳既整體感覺影響幾乎0, 一點瑕疵囉~ 加上唔止一次了... 要認真改善... WORTHINESS 最後食左二千大洋, 望落好貴, 但比起其他五星酒店西餐廳, 動輒每位幾千, 呢度算蚊同牛比! 最後, 如前文所提, 在下誠意推介以下既二人餐單 (價錢只供參考, 或許現在已漲價多少) 頭盤: 蟹肉班戟 $320 主菜: 烤羊架 $430 芝士火鍋 $270 甜品:朱古力小屋 $180 總共$1200, 加埋一俾埋小費千四樓下~ 注意: 1. 唔食蟹既, 可以叫Pan Fried Foie Gras (煎鵝肝), 同樣係半島名物, 價錢差不多 2. 唔食羊既, 可以叫Slow Cook Salmon (慢煮三文魚), 雖然驚喜及不上羊架, 但也算誠意之作 3. 唔食芝士既....可以唔駛黎....因為成間餐廳都係芝士味, 一定玩得死你. 4. 一定要注意菜式順序! 主菜一定要放芝士火鍋前面, 落單時同侍者溝通一下, 否則好大機會食完芝士火鍋就冇晒胃口食主菜! 5. 以上菜式係完全足夠兩個人食, 小心眼濶肚窄. 6. 水可以叫 Normal Water (Tap Water/ Table Water/ 普通水), 呢間餐廳唔會俾臉色你睇 7. 如計劃喺大時大節黎食飯, 可能要早個幾月至幾個月前訂枱, 餐廳唔大, 而且又出名, 經常爆到七彩 8. 行有餘力既可以叫杯咖啡埋尾(大約$70一杯), 配埋petit four, 咁就係完美ending 9. 男士留意Dresscode, Smart Casual, 唔好背心短褲涼鞋拖鞋就可以了~ 友人是引入此評分制度後第一個評分之人, Review卻足足拖了11個月, 謹此致歉~ RATING: Food: 34.25/40 Environment: 24.25/30 Service: 27.5/30 Minus: Nil Bonus: +3 (Peninsula Name) Total: 89/100 Ranking: B+ Come Back: A Must
